primeminister.kz
Bıylǵy 9 aıdyń qorytyndysy boıynsha respýblıkada júk tasymalynyń kólemi 5,5 mln tonnaǵa jetken. Bul ótken jylmen salystyrǵanda 22%-ǵa artyq. Tasymaldaǵy otandyq operatorlardyń úlesi 42%-dy quraǵan.
«Tranzıttik tasymaldarda da oń úrdis baıqalady. О́tken jylmen salystyrǵanda 44% deńgeıinde – 2,5 mln tonnadan 3,6 mln tonnaǵa deıin ósim boldy. Negizgi júk kólemi Qytaı eline tıesili, atalǵan baǵyt boıynsha júk tasymaly 2 esege, ıaǵnı, 1,5 mln tonnaǵa deıin artty. Sonymen qatar Qytaıdan Eýropaǵa tasymaldanatyn tranzıttik júkterdiń kólemin odan ári arttyrýdyń úlken áleýeti bar. Aǵymdaǵy serpindi saqtaı otyryp, Qazaqstan aýmaǵy arqyly ótetin tranzıt deńgeıi 2029 jylǵa qaraı 5 esege artady, bul el ekonomıkasynyń damýyna oń áser etedi.
Teńiz arqyly jetkiziletin júkterdi avtokólikke aýdarý jáne tasymaldarda otandyq operatorlardyń úlesin ulǵaıtý úshin bond qoımalaryn uıymdastyrý, ótkizý beketteriniń qýatyn arttyrý, ishki avtoparkti keńeıtý, sondaı-aq ruqsat berý qujattaryn bólýdiń tıimdi júıesin engizý jóninde sharalar qabyldanatyn bolady», delingen habarlamada.
Álıhan Smaıylov avtomobıl kóligimen júk tasymaldaý salasynyń damýy ekonomıkanyń barlyq sektorlaryna oń áserin tıgizetinin aıtty. Qazirgi tańda Qazaqstan arqyly 8 halyqaralyq avtomobıl dálizi ótedi. Olardyń jalpy uzyndyǵy shamamen 13 myń shaqyrym. Negizgi kúre joldardyń qatarynda Batys Eýropa – Batys Qytaı, Soltústik – Ońtústik, TRASEKA baǵyttaryn aıtýǵa bolady.
«Atalǵan baǵyttar boıynsha júk tasymalyn ulǵaıtý jáne júkterdiń jyldam ótýin qamtamasyz etý úshin bul saladaǵy kedergilerdi barynsha qysqartý qajet. Olardyń qataryna shekaradaǵy keptelister men qujattardyń uzaq rásimdelýin, ınfraqurylym sapasyn, uıymdastyrý jumystarynyń nasharlyǵyn jáne kóptegen basqa da jaıttardy jatqyzýǵa bolady. Kólik ıelerinen kelip túsetin shaǵymdar kóbine osy máselelerge qatysty», dedi Á.Smaıylov.
Úkimet basshysy júkter men qujattardyń tym uzaq tekserilýi de narazylyq týǵyzatynyn, sıfrlyq tehnologııalar men aqparattyq júıelerdiń ıntegrasııasy arqyly bul máselelerdi osy ýaqytqa deıin bir júıege keltirýge bolatynyn eskertti.
