Jaqsylyq Úshkempirov atyndaǵy sport saraıyna jınalǵan san myń jankúıer Jalǵas Jumaǵulovtyń (14-9) aıqas alańyna shyqqanyn taǵatsyzdana kútti. Kezinde ol reseılik «Fight Nights Global» uıymynyń chempıony bolǵannan keıin UFC-men kelisimshartqa otyrǵan edi. Alaıda álemniń eń beldi promoýsheni uıymdastyrǵan dúbirli dodalarda qandasymyzdyń joly bolmady. 7 jekpe-jektiń altaýynda jeńilgen Jumaǵulov qaıta elge oraldy. Astanada 35 jastaǵy saqa sportshy japonııalyq Masato Nakamýramen (9-7) judyryqtasty. Bul báseke uzaqqa sozylǵan joq. Jalǵas qarsylasyn birinshi raýndta-aq aýyr soqqysymen uryp jyǵyp, dúıim jurttyń qoshemetine bólendi.
Elorda tórinde ótken jarystyń basty jekpe-jeginde Dıas Erenǵaıypov (14-3) pen Japonııanyń taǵy bir faıteri Rýı Fýkýda (21-7-1) «Naiza» uıymynyń altyn belbeýin sarapqa saldy. Bul aıqasta Dıas upaı sanymen jeńise jetti.
