Sıfrlyq damý, ınnovasııalar jáne aeroǵarysh ónerkásibi mınıstrligi SpaceX kompanııasynyń kómegimen shalǵaıdaǵy 10 aýyldyq mektepti ǵalamtorǵa qospaqshy. Starlink jelisi qanatqaqty rejimde Kóktal, Kúıgen, Qaraoı, Jińishke, Ereýil, Kensý, Sarykól, Taldy, Qaraǵaıly, Maıshuqyr aýyldarynyń mektepterinde jumys isteıdi.
«Aqmola oblysy Maıshuqyr aýylynyń bastaýysh mektebinde 35 oqýshy oqıdy. Endi olarda qalalyq mektep oqýshylary sııaqty qosymsha sabaqtar men ınternetke qol jetkizý múmkindigi bar. Starlink arqyly qosylýdyń taǵy bir artyqshylyǵy – baǵa mektepterdiń ınternettegi aǵymdaǵy shyǵyndarynan qymbat bolmaıdy. Tipti arzanyraq. Baılanys sapasy áldeqaıda jaqsy», dep habarlady Sıfrlyq damý, ınnovasııalar jáne aeroǵarysh ónerkásibi mınıstrliginiń baspasóz qyzmeti.
Mınıstrliktiń Starlink-ti tańdaýynyń 3 sebebi bar: shalǵaı aımaqtarǵa qoljetimdi, joǵary jyldamdyq, sıfrlyq ınfraqurylymdy damytý. Mınıstr Baǵdat Mýsın Digital Bridge 2023 forýmynda otandyq telekom-kompanııalardyń shalǵaıdaǵy mektepterdi ınternetpen qamtamasyz ete almaǵanyn aıtqan edi. Onyń túsindirýinshe, vedomstvo sol sebepti Ilon Masktiń kompanııasyna júgingen.
– SpaceX vıse-prezıdenti Loren Dreıer ekeýmiz Prezıdentke spýtnıktik antennalar arqyly sekýndyna 4 megabıt ınternet alatyn shalǵaı aýdandardaǵy 2000 mektepti Starlink-pen alty aı ishinde qamtamasyz etetinimizdi habarladyq. Osylaısha, mektepterdegi ınternet máselesin birjola sheshemiz. Keıde el ishindegi máselelerdi ózimiz sheshkimiz kelgenmen, qoldan kelmeı jatatyny bar. Bulaı bolǵanyna keshirim suraımyn. Biraq SpaceX sııaqty damyǵan tehnologııalar bar kezde, olardy qoldanbaý da qatelik bolar edi, – dedi B.Mýsın.
Jaqynda ǵana Kazinform Pavlodar oblysyndaǵy 20-ǵa jýyq mektepti Starlink-ke qosý da josparlanyp otyrǵanyn habarlaǵan bolatyn. Bular – ınternetke kirý men jeli qosýdyń tehnıkalyq múmkindigi joq aýyldyq mektepter. Qosylý quny bir abonent úshin aıyna 200 dollardy nemese 94 myń teńgeni quraıdy.
– Bizde máselesi kóp mektepter bar. Onda múldem ınternet joq dep aıtýǵa bolady. Osy 21 mektepti joǵary jyldamdyqty Starlink ınternetimen qamtamasyz etkimiz keledi. Olardyń ınternetke qol jetkizýin qamtamasyz etýdiń basqa múmkindigi joq. Bul aýyldarǵa eshkim optıka sala almaıdy. Sebebi óte qymbat, radıorelelik stansalar bul máseleni tehnıkalyq áleýetiniń jetpeýinen sheshe almaıdy. Ásirese Baıanaýyl aýdanynda taýly jerler bar, onda jer bederiniń ereksheligine qatysty sapaly sıgnal berýde qıyndyq kóp, – deıdi Pavlodar oblystyq sıfrlyq tehnologııalar basqarmasynyń basshysy Elnur О́tebaev.
Onyń aıtýynsha, qazir Pavlodar oblysynda 352 aýyldyń 11-inde symdy nemese mobıldi jelige qosylý múmkindigi joq. Munda 1,1 myńnan astam adam turady. Internetke qoljetimdi birqatar aýyl bar, biraq onyń sapasy men jyldamdyǵy ortashadan tómen. Úıdegi ınternetke qatysty máseleler de jetkilikti.
