Oblystyq týrızm basqarmasy bıyl óńirdiń negizgi týrıstik oryndaryna navıgasııalyq júıeni ornatý jobasyn iske asyrýdy bastaǵan edi. Atap aıtsaq, Tańbaly tas, Túrgen jáne Talǵar, Saty shatqaldary, Assy ústirti, Talhız qalashyǵy, Kólsaı, Qaıyńdy jáne Esik kólderi, Qara Kanon týrıstik baǵyttary boıynsha jumystar júrgizip, nátıjesinde belgilengen núktelerge 42 birlik baǵyttaýshy belgiler men stellalar ornatty.
Sondaı-aq 120-dan asa demalys aımaǵy ornalasqan Qapshaǵaı sý qoımasynyń jaǵalaýynda týrıstik baǵyt-baǵdar júıesin keńeıtý jumystary júrgizilgenin ataý lázim.
Tabıǵı resýrstarǵa baı ári qolaıly ınvestısııalyq klımaty bar perspektıvaly óńirdiń aıtarlyqtaı óndiris áleýeti bar. Sonymen qatar oblys barlyq maýsymdyq týrızmdi damytýǵa óte qolaıly. Munda týrızmniń túrlerin, atap aıtqanda kıeli, ekologııalyq, mádenı-tarıhı, kempıng, gastronomııalyq, ańshylyq, etnografııalyq, tipti áleýmettik túrlerin tolyqtaı damytýǵa bolady. Bul aımaq búginde eldiń bıznes-qoǵamdastyǵyn jáne sheteldik týrısterdi tartýda belsendi.
«Jeńil ınfraqurylymdy qurý elimizdiń týrıstik salasyn damytýdyń 2023-2029 jyldarǵa arnalǵan tujyrymdamasyn iske asyrý sheńberinde júrgizildi. Negizgi maqsaty – týrızm ınfraqurylymyn jaqsartý, týrısterdiń týrıstik-rekreasııalyq aımaqtarǵa jetýin jeńildetý jáne týrısterdiń beıtanys aımaqtarda yńǵaıly júrýine jaǵdaı jasaý.
Qabyldanyp jatqan is-sharalar óńirdiń tartymdy týrıstik ortalyq retinde destınasııanyń oń ımıdjin qalyptastyrýǵa múmkindik beredi. Sondaı-aq oblys aýmaǵynda týrısterdiń jaıly jáne yńǵaıly saparlaýyna jáne oń keri baılanys arqyly týrıster sanynyń artýyna yqpal etedi», deıdi «Almaty oblysynyń týrıstik aqparattyq ortalyǵy» KMQK dırektorynyń orynbasary Azamat Joldanbaev.
Almaty oblysy
