Osy ýaqyt aralyǵynda atalǵan qyzmetke 117 adam úmitker retinde tirkelip, qujat ótkizgen eken. Temirtautynysy.kz-tiń jazýynsha, bir ýaqytta prorektor laýazymyna munsha adamnyń konkýrsqa qatysýy – otandyq ýnıversıtetterdiń tarıhynda bolmaǵan oqıǵa.
Vakantty laýazymǵa konkýrs «Akademık E.A.Bóketov atyndaǵy Qaraǵandy ýnıversıteti» KEAQ Dırektorlar keńesiniń sheshimimen jarııalanǵan. Habarlandyrý oqý ordasynyń resmı saıtynda, áleýmettik jelide, sondaı-aq headhunter (hh.kz) jáne enbek.kz jumyspen qamtýdyń elektrondy alańdarynda jarııalanǵan. Konkýrsqa qujat qabyldaý 2023 jyldyń 10 jeltoqsanynda aıaqtaldy. Osy aralyqta 117 azamat úmitker retinde tirkelip úlgeripti. Olardyń arasynda otandyq ǵalymdar ǵana emes, Reseı, Ýkraına jáne Ońtústik Afrıka Respýblıkasynan da úmitkerler bar.
«Qazir biz Dırektorlar keńesimen birge úmitkerlerdiń qujattaryn qarap, olardyń talapqa saı bolýyn barynsha qadaǵalap jatyrmyz. Búgin de úlken otyrys ótti. Úmitkerge qoıylatyn basty talap – joǵary oqý oryndarynda basqarý tájirıbesi jáne kreatıvti oılap, kez kelgen qıyndyqty eńseretin qabilet ıesi bolýy. Sonymen qatar, úmitker akademııalyq adaldyqty ustam etýi tıis», deıdi ýnıversıtettiń basqarma tóraǵasy – rektory Nurlan Dýlatbekov.
Aıta ketý kerek, qazirgi tańda E.A.Bóketov atyndaǵy Qaraǵandy ýnıversıtetinde aýqymdy jańǵyrtý jumystary júrgizilip jatyr. Oqý ordasy óndirisi órkendegen Qaraǵandy oblysyna ǵana emes, kúlli respýblıkaǵa jaqsy tanymal. Sonymen qatar alys-jaqyn shet memleketterdiń joǵary oqý oryndarymen áriptestik baılanys ornatylyp, qarym-qatynas kúsheıgen. Asa jaýapty qyzmetti atqarýǵa júzden astam adamnyń qulshynys tanytýy oqý ordasy ımıdjiniń bul kúnde qanshalyqty nyǵaıǵanyn ańǵartatyndaı.
