Aldyn ala boljam boıynsha, 2024 jyly 18 jasqa tolatyn azamattar bir jyl úshin 160–170 dollar alady. Al bıyl dúnıege kelgen balalar 18 jasqa tolǵanda, 3,5 myń dollar alýy yqtımal.
Qordan qarjy dollar aqsha birligimen aýdarylyp otyrady. Esepshotta jınalǵan somany bala tek kámelet jasqa jetkende qoldana alady.
«Ulttyq qor - balalarǵa». Ata-analar ne isteý kerek?
2006 jyly jáne odan keıingi jyldary dúnıege kelgen balalalary bar ata - ana perzenti ulttyq qordan bólingen qarjydan qaǵylmaı, kepildi túrde aqsha túsip turý úshin:
- Balanyń jeke basyn kýálandyratyn qujat, onyń ishinde JSN alý kerek;
- Kámeletke tolmaǵan balanyń bazadaǵy málimetterin: tegi, aty, ákesiniń aty; týǵan jyly; 18-ge tolmaǵan balanyń JSN men azamattyǵyn tekserý;
- «Elektrondyq úkimet» veb-portalyndaǵy «Balalar týraly aqparat» taraýyndaǵy jeke kabınette bala týraly aqparattyń bolýyn tekserý qajet.
Arnaıy esepshot ashý kerek pe?
Ulttyq qordan balaǵa aqsha túsip turý úshin, túrli mekemege sabylýdyń qajeti joq.
1. Shottar «BJZQ» AQ-da (ekinshi deńgeıdegi bankterge júginý talap etilmeıdi) Ádilet mınıstrliginiń jeke tulǵalarynyń derekqory negizinde avtomatty túrde ashylatyn bolady.
2. Jyl saıyn qańtar aıynda jobaǵa qatysqan sátten bastap 18 jasqa tolǵanǵa deıin «BJZQ» AQ-daǵy balalardyń shottaryna shartty túrde qarajat túsip turady.
Mysaly, eger bala joba bastalǵan kezde 5 jasta bolsa, oǵan jyl saıyn 13 jyl ishinde, ıaǵnı kámeletke tolǵanǵa deıin Ulttyq qordyń ınvestısııalyq tabysynyń bir bóligi aýdarylady.
Qordaǵy qarjyny bala qashan ala alady?
18 jasqa tolǵan kezde qarajat balanyń menshigi bolyp esepteledi. Ol jınalǵan qarajatty qalaı paıdalanýdy ózi sheshedi. (bilim alýǵa nemese turǵyn úı jaǵdaıyn jaqsartýǵa). Úkimet bul rette sheteldik oqý ornynda oqý aqysyn tóleýge qarajatty paıdalanýdy shektemeý týraly sheshimdi qarastyryp jatyr.
О́z kezeginde Turǵyn úı jaǵdaılaryn jaqsartý nemese turǵyn úı satyp alý úshin qarajatty paıdalanýǵa tek Qazaqstan aýmaǵynda ǵana ruqsat etiledi. Osy qarajatqa satyp alynǵan turǵyn úıdi qaıta satý boıynsha shekteý qoıylmaıdy.
