Foto: ashyq derekkóz
Avtokólik ıeleriniń 10-nan 9-y qysta bastan ótkeretin qıyndyqtyń biri – aldyńǵy áınekti qardan tazalaý, muzdan arshý. Biz búgin aldyńǵy áınektegi osy bir kedergilerdi ońaı ári jyldam jeńýdiń tekserilgen 5 tásilimen bólisemiz. Oń, teris tusyn saralaımyz.
- Avtólik áınegine arnalǵan qorǵanysh qaptar.
Áınekti qardan tazalaý tez tynatyn ári unamdy is emes. Jeter jerge asyǵyp, ýaqyt taıaǵanda qapylmaý úshin arnaıy áınek qabyn paıdalansańyz bolady. Osy turǵydan alǵanda arnaıy qaptamalar qolaıly. Tek sý ótkizbeıtin, tyǵyz, ylǵal men jelden qorǵaıtyn materıaldan jasalǵanyna kóz jetkizińiz. Osyndaı qaptama qoldansańyz, kólikke jaıǵaspas buryn, qorǵanysh quralyn alasyz da, júıitkip kete beresiz.
Artyqshylyǵy: ýaqyt únemdeısiz, kóp kúsh jumsamaısyz.
Iá. Qorǵanysh qaptamanyń keri tustary joq emes. Kemshilikteri: naqty avtomobıldiń parametrlerine sáıkes tııanaqty tańdaý jasaý, qaptamany muqııat, myǵym ornatý, syrǵyp nemese qatty jelge ushyp ketý qaýpi de joq emes.
- Artyq shyǵyn men qosymsha qozǵalyssyz aldyńǵy áınekte muz qatýdyń aldyn alý úshin kólikti jabyq turaqqa ornalastyrmas buryn ishtegi temperatýrany qalypqa keltirý. Tereze men esikti ashý nemese peshti aldyn ala óshirý usynylady.
Artyqshylyǵy: artyq qarjy jumsamaısyz.
Kemshiligi: birashama ýaqyt qajet, temperatýra kúrt ózgerse kómektespeıdi. Júrgizýshiniń salqyn tıip aýyryp qalý qaýpin joǵarylatady.
- Aldyńǵy áınekke jyly aýa jiberý.
Aldyńǵy áınekke muz qatqan jaǵdaıda eń qaýipsiz tásil – muzdy tabıǵı jolmen eritý. Bul prosesti kútýge ýaqyt tyǵyz bolsa jyldamdatý úshin jyly aýa aǵynyn qosyp, ony áınekke baǵyttaýǵa bolady. Eskeretini bul áreket qozǵaltqysh iske qosylǵannan keıin lezde jasalý kerek.
Artyqshylyǵy: qosymsha shyǵyndardy qajet etpeıdi, áınekti zaqymdamaıdy.
Kemshiligi: qatqan muz qabaty qalyń bolsa kómektesý yqtımaldyǵy edáýir tómendeıdi.
- Kópshilik qoldanatyn arnaıy shetkalardy paıdalaný.
Shuǵyl kólik júrgizý qajet bolǵanda taptyrmas qural. Dese de arnaıy shetkalardy kólikte peshti qosyp jáne áınek ishinen jyly aýa baǵyttaýmen bir mezette paıdalaný kerek.
Artyqshylyǵy: yńǵaıly, áınekti tez tazalaýǵa bolady.
Kemshiligi: óte muqııat qoldanbaǵan jaǵdaıda áınekke syzat túsirýi múmkin.
- Muzdy tazalaýǵa arnalǵan avtohımııalyq eritindiler.
Bul aldyńǵy áınekten muzdy ketirýge arnalǵan eń ınnovasııalyq tásil. Hımııalyq reagentter men sý arasyndaǵy reaksııa prınsıpi boıynsha jumys isteıtin avtohımııalyq ónimderdi áınekke shashyp shetka nemese arnaıy materıalmen dereý súrtý kerek.
Artyqshylyǵy: jyldam, yńǵaıly ári árqashan qoljetimdi.
Kemshiligi: avtohımılyq ónimder túrli gradýsqa laıyqtalyp jasalady. Sondyqtan ony tańdarda quramy men paıdalaný erejesine asa saq bolý qajet.
