Foto: Májilis
«Jambyl oblysy aǵyn sýdy transshekaralyq ózenderden alady. Onyń 82% Qyrǵyz Respýblıkasynan keledi. Osy jyldyń shilde-tamyz aılarynda Qyrǵyzstannan beriletin 3,5 mln tekshe metr sýdyń taýsylýyna baılanysty sý berý toqtatyldy. Osyǵan baılanysty shilde-tamyz aılarynda Jambyl oblysynyń alty aýdanynda aǵyn sý tapshylyǵy oryn alyp, 9 myń gektar alqaptaǵy egis zardap shekken. Shyǵyn kólemi 3,6 mlrd teńge. Búgingi kúni Jambyl men Túrkistan oblysynda sýarmaly jerler 300-500 myń gektar jerge deıin jetedi», dedi Qaırat Balabıev.
Depýtattyń aıtýynsha, bul oblystyń bári transshekaralyq aýyl sharýashylyǵy óńiri bolǵandyqtan sý ár ýaqytta qajet.
«О́zińiz Jambyl oblysyn basqarǵan tusta sharýalardy sýdan taryqtyryp aldyńyz. Sý salasynyń mınıstri bolyp júrgen kezde maqtashylarǵa sý jetkize almadyńyz. Kúngeıdegi sharýalardyń shyryldap júrgende kúz de ótip ketti. Bizdiń elimizde beriletin transshekaralyq ózen sýlaryn arttyrý máselesi qarastyryla ma? Máseleni qandaı joldarmen sheshpeksizder? Qashanǵy kisideginiń kilti aspanda demekshi kórshilerdiń kóńiline qaraımyz? Kiriptarlyqtan aıyrylatyn jol bar ma? Bıylǵy qurǵaqshylyqtyń keleshekte qaıtalanbaýyna qandaı kepildikter bar?», dedi depýtat mınıstrge.
О́z kezeginde mınıstr Nurjigitov bıyl Jambyl oblysynda sý tapshylyǵyna baılanysty sharýa qojalyqtar zardap shekkenin aıtty.
«Jambyl oblysyndaǵy Talas pen Shý ózeni boıynsha jaǵdaı sýlylyǵyna baılanysty boldy. Sebebi Qyrǵyzstanda sý mólsheri sondaı deńgeıde boldy. Al endi transshekaralyq ózender boıynsha kelisimdi qalaı júrgizemiz? Qyrǵyzstanmen mysaly 2000 jyly ekijaqty transshekaralyq ózenderdi paıdalaný jaǵynan kelisimshartymyz bar. Sol kelisimshartqa baılanysty Talas ózeni 50-de 50 mólsherinde, al Shý ózeni 42-de 58 paıyz bólingen. Sondyqtan ár jyldyń óziniń sýlylyǵyna baılanysty sý kólemi bólinedi. Bizdiń taraptan ony kóterý máselesin biz qarastyryp jatqan joqpyz. Sebebi naqty óziniń paıyzdyq mólsheri bar», dedi mınıstr.
Mınıstrdiń pikirinshe, Ortalyq Azııadaǵy bes memleket 1992 jyly týra sondaı kelisim jasaǵan. Sol kelisimde burynǵy Keńes odaǵyndaǵy sý qalaı bólinedi – týra sondaı kólem rastalǵan. Atap aıtqanda, Syrdarııa ózeninde sý kóp bolsa bizge Qazaqstanǵa 12 tekshe shaqyrym sý beriledi. Sondyqtan bul jumystar tek kelissózder arqasynda atqarylyp jatyr.
