Qazaqtyń dańqty sportshysy, jelmen jarysqan jelaıaq Ámın Tuıaqovtyń qurmetine uıymdastyrylǵan dúbirli dodaǵa Armand Dıýplantısten basqa da kóptegen dúldúl kelmekshi. Jaqynda Gýdaf Segaı men Arne de Grass syndy áıgili jeńil atletterdiń osy jarysta baq synaıtyny belgili boldy. Al sol ataǵy alysqa taraǵan saqa sportshylar jaıynda biz ne bilemiz?
26 jastaǵy Gýdaf Segaı Efıopııada dúnıege keldi. 2021 jyly Tokıo Olımpıadasynda 5 000 metrge júgirgen ol qola medaldy moınyna ildi. Bul jarysta qara qurlyqtyń ókili óziniń burynǵy otandasy, qazirgi kezde Nıderlandtyń namysyn qorǵap júrgen Sıfan Hassan men kenııalyq Helen Obırıden ǵana qalyp qoıdy. Álem chempıonatynda Gýdaf júldelerdiń tolyq jıyntyǵyn jeńip aldy. Iаǵnı 2019 jyly Dohada qola alsa, 2002 jyly Oregonda kúmispen kúpteldi. Bul jarystarda ol 1 500 metrlik saıysta baq synady. Bıyl Segaı 10 000 metrlik qashyqtyqty 31 mınýt 27,31 sekýndta júgirip ótip, altynnan alqa taqty.
Arne de Grass 29 jasta. Ol Kanadanyń Toronto qalasynda týyp-ósti. 100 ben 200 metrge júgirý jáne estafetalyq saıysta Arne tolaǵaı tabystarǵa qol jetkizdi. Atap aıtsaq, Rıo-de-Janeıro men Tokıoda alaýy tutanǵan Olımpııa oıyndarynda 1 altyn, 2 kúmis jáne 3 qola oljalady. Álem chempıonattarynda 1 altyn, 1 kúmis jáne 3 qola medaldy qorjynǵa saldy. Panamerıka oıyndarynyń eki dúrkin jeńimpazy degen ataǵy taǵy bar. Ásirese Arne de Grass 200 metrge óte keremet júgiredi. Máselen, dál osy qashyqtyqta Úıeńki japyraqtary eliniń ókili Rıo olımpıadasynda dańqy jer jarǵan Ýseın Bolttan ǵana qalyp qoısa, Tokıoda shashasyna shań juqtyrmady.
Esterińizge sala keteıik, World Athletics týrnırler serııasy 27 qańtarda Astanadan bastaý alyp, 23 aqpanda Madrıdte óz máresine jetedi. Sol aralyqta jeti týrnır ótkiziledi. Ár týrdyń qorytyndysy boıynsha kóp upaı jınaǵan sportshy jeńimpaz dep jarııalanyp, olar 10 myń dollar kóleminde syıaqy alady.
