Jeltoqsannyń 25-i kúni «Atameken» óner ordasynda «Azattyqtyń aq tańy» atty respýblıkalyq aıtys Batys Qazaqstan oblysy ákimdigi, oblystyq mádenıet, tilderdi damytý jáne arhıv isi basqarmasynyń qoldaýymen, Qadyr Myrza Áli atyndaǵy oblystyq mádenıet jáne óner ortalyǵy men «Aıtys aqyndary men jyrshy-termeshilerdiń halyqaralyq odaǵy» BQO fılıalynyń birlese uıymdastyrýymen ótti.
Sýyryp salma jyr báıgesine Abaı Jolmaǵambetov (Mańǵystaý), Aıbek Qalıev (Arqalyq), Aınabek Bısenǵalıev (BQO), Aıtbaı Jumaǵulov (Qaraǵandy), Baýyrjan Shırmedınuly (BQO), Birjan Baıtýov (Shymkent), Jansaıa Mýsına (BQO), Juldyz Qojabekova (Aqtóbe), Qaınar Alagózov (Aqtóbe), Meıirman Shákenov (BQO), Muradym Merlanov (BQO), Muhtar Nııazov (Qyzylorda), Talǵat Myqı (BQO), Shalqarbaı Izbasarov (Atyraý), Shuǵaıyp Sezimhan (Almaty), Shynarbek Qabıev (Atyraý) syndy 16 aqyn qatysty.
Jyr dodasyn Qazaqstannyń eńbek sińirgen qaıratkeri, «Qurmet» ordeniniń ıegeri, Parlament Májilisiniń depýtaty, aqyn Amanjol Áltaı júrgizdi.
Bul aıtystyń bir ereksheligi – kópten beri syrqatyna baılanysty aıtystan kórinbeı júrgen Júrsin Erman aǵamyzdyń Aqjaıyqqa arnaıy kelip, qazylar alqasyna jetekshilik etýi boldy.
«Azattyqtyń aq tańy» dep atalǵan respýblıkalyq aıtysqa qatysýǵa kelgen barsha aqynǵa qutty bolsyn aıtamyn. Eki-úsh jyldan beri myna syrqattyń tyrnaǵyna ilinip qalyp, aıtystarǵa bara almaı júr edim. Osy aıtysqa ózimdi ózim qınaǵandaı bolyp kelip otyrmyn. О́ıtkeni aıtystyń astanasy – Almaty men Astana bolsa, sodan keıingi irgeli orda – osy Oral. Talaı keremet dodalardyń kýási bolǵan jurt bul. Endi myna dilmar aqyndardan atyna zaty saı bolatyn kesek jyr, kesteli sóz tosamyz. Aıtyńdar, tartynbańdar! Aıtystyń salty sol – aıtý! Barshańyzǵa aq júzdi, nurly bolyńdar, aıtystan jasymaı qaıtyńdar, tasyp qaıtyńdar degen tilek aıtamyn. Aıtys qutty bolsyn!» dedi «Otan» ordeniniń ıegeri, Qazaqstannyń eńbek sińirgen qaıratkeri Júrsin Erman.
Batys Qazaqstan oblysy ákiminiń orynbasary Baqytjan Narymbetov aıtystyń ashylý saltanatynda quttyqtaý sóz sóılep, aıtysker aqyndarǵa aq jol tiledi.
Bes saǵattan asa ýaqytqa sozylǵan aıtystyń qazylar alqasy qatarynda Memlekettik syılyqtyń laýreaty Ǵalym Jaılybaı, Qazaqstan Jazýshylar odaǵynyń múshesi, aqyn Qudaıberli Myrzabek, Mádenıet qaıratkeri Serik Qusanbaev, Bilim berý salasynyń úzdigi, aqyn Darıǵa Mushtanova, Qazaqstannyń eńbek sińirgen qaıratkeri, aqyn Aıtaqyn Bulǵaqov, Mádenıet qaıratkeri, Memlekettik «Daryn» syılyǵynyń ıegeri, aqyn Bekarys Shoıbekov, «Aıtys aqyndary men jyrshy-termeshilerdiń halyqaralyq odaǵy» BQO fılıalynyń ókili Baýyrjan Halıolla syndy qalamgerler boldy. Saıys sońynda qazylar alqasy barlyq aqynǵa birdeı 500 000 teńgeden júlde berdi. Aqyndar BQO ákiminiń Alǵyshatyna ıe boldy. Budan bólek, qazaq aıtysynyń qatepti qara nary, abyzy atanǵan Júrsin Ermanǵa Aqjaıyq jurtynyń atynan Baqytjan Narymbetov shapan jaýyp, tulpar mingizdi. Bıyl 60-qa tolǵan aqyn Serik Qusanbaevqa Aqjaıyq óńiri at mingizip, ıyǵyna shapan japty.
«Elimizdiń qos birdeı azamatyna at mingizip, qoldaý kórsetken jergilikti mesenat, óner, sport jáne aıtys janashyry Qurmanǵalıev Madııar Qýanyshulyna aqjarma alǵys bildiremiz», deıdi osy is-sharany uıymdastyrýshylardyń biri Baýyrjan Halıolla.
Batys Qazaqstan oblysy
