Sýretti túsirgen – Iýrıı Bekker
Ýnıversıtet basshysy Aqylbek Kúrishbaev qazirgi ýaqytta jekemenshikke ótip ketken ýnıversıtet aktıvterin keri qaıtarý jumystary jalǵasyp jatqanyn jetkizdi. Buǵan deıin №6 stýdenttik jataqhana turǵyn úı qoryna qaıtarylyp, 280 stýdent baspanaly bolǵany belgili. Endigi kezekte «Shah» meıramhanasy men ofıs retinde jeke kásipker paıdalanyp kelgen №3 stýdenttik jataqhana da keri qaıtarylyp, tolyqtaı kúrdeli jóndeýden ótti. Bul maqsatqa ýnıversıtettiń bıýdjetinen 160 mln teńgege jýyq qarajat bólingen. Rektordyń aıtýynsha, mundaı aýqymdy jóndeý jumystary keıingi 20 jylda júrgizilmegen. «Rıtm Stroı EK» kompanııasynyń qoldaýymen jataqhananyń syrtqy jaǵy jáne ishki bólmeleri, as úıler men dálizder, tazalyq oryndary jańasha dızaınmen órnektelip, qajetti jıhazdar, muzdatqyshtar, kir jýǵysh mashınalary men gaz plıtkalarymen jabdyqtaldy. Nátıjesinde, zamanaýı 200 bólmege stýdentter, 100 bólmege magıstranttar men jas ǵalymdar qonystandy.
Atalǵan is-sharaǵa qatysqan el fýtbolynyń ardageri Quralbek Ordabaev, Olımpıada chempıony Ermahan Ibraımov, bokstan birinshi jartylaı orta salmaqtaǵy IBO chempıony Janqosh Turarov, ınvestor kompanııalardyń ókilderi qatysyp, aýyl sharýashylyǵy salasyna mamandanyp jatqan stýdentterge sáttilik tilep, kúres, boks sııaqty sport túrlerinen jetistikke jetip, respýblıkalyq dodada oqý orny namysyn qorǵap júrgen jastardyń qatary ortalyq stadıonnyń ashylýymen taǵy da tolyǵa túsetindigine senim bildirdi. Jańartylǵan stadıonǵa «Atlant Systems» seriktestigi tarapynan 130 mln teńge tartylyp, qurylys jumystaryn «Korkem» kompanııasy júrgizgen.
Prorektor Q.Sultanǵazıevtiń aıtýynsha, oqý ornynda plastık tereze jáne esik shyǵaratyn, tigin, sondaı-aq mebel sehy ashylyp, jataqhanalardy jabdyqtaý isi qolǵa alynǵan. Mundaǵy sehtarda arnaıy mamandarmen qatar óndiristik tájirıbe jınaý maqsatynda stýdentter de jumys isteıdi. Qazirgi kezde jańadan ashylǵan jataqhanalar osy óndiristik sehtarda jasalǵan jıhazdarmen qamtamasyz etilip otyr. Endigi kezekte ýnıversıtetke tıesili barlyq jataqhanany jıhazben jabdyqtaý isi jalǵasyn taýyp, 2 myńǵa jýyq oryn qajettilikpen qamtamasyz etilmek.
Oqý orny stýdentteri úshin taǵy bir jaǵymdy jańalyq – «Qazaq-Stroı» seriktestigimen yntymaqtastyq shart negizinde 9 qabatty 450 orynǵa arnalǵan stýdenttik jataqhananyń qurylysy bastaldy. Oǵan tartylǵan ınvestısııa kólemi 2,3 mlrd teńgeden asady. Jataqhana janynan stýdentter úshin Medısınalyq ortalyq turǵyzý da josparda bar.
Búginde ýnıversıtet quramyna 6 iri ǵylymı-zertteý ınstıtýty men bir tájirıbelik sharýashylyq kiredi. Álemniń jetekshi joǵary oqý oryndarynyń tájirıbesine sáıkes, «ǵylym – bilim – óndiris» júıesi engizilip, tıimdiligin kórsetip keledi. Oqý orny bıyl 4 halyqaralyq jáne ulttyq reıtıngte laıyqty oryndarǵa ıe boldy. Sonymen qatar ýnıversıtet bazasynda «Tashkent ırrıgasııa jáne aýyl sharýashylyǵyn mehanıkalandyrý ınjenerleri ınstıtýty» ulttyq zertteý ýnıversıtetiniń sý sharýashylyǵy mamandaryn daıarlaý jónindegi fılıaly ashylyp, sheteldiń 7 joǵary oqý ornymen eki dıplom alý baǵdarlamasy engizildi. Al Varshava Jaratylystaný ǵylymdary ýnıversıtetimen «IT-tehnologııalardy qoldaný arqyly sý resýrstaryn basqarý» magıstratýra baǵdarlamasy boıynsha úsh jyl qatarynan túlekter bitirip shyqty. Sondaı-aq Qytaı aýyl sharýashylyǵy ýnıversıtetimen, Lıtva densaýlyq ǵylymdary ýnıversıtetimen eki dıplomdyq oqytý isi qolǵa alynyp jatyr.
ALMATY
