Erekshe poıyz jolaýshylarǵa merekelik atmosfera syılaý úshin jańa jylǵa saı bezendirilgen. Vagon jolserikteri bir ýaqyt Aıaz Ata men Aqshaqar keıpine enip, jolaýshylardy kele jatqan merekemen quttyqtap, syılyqtar tabystaıdy. Merekelik bezendirilgen poıyz quramy jańajyldyq demalys maýsymy aıaqtalǵanǵa deıin qatynaıdy.
«Bıyl ekinshi jyl qatarynan jańa jyl qarsańynda QTJ-men birlesip brendtelgen týrıstik poıyzdy iske qosyp otyrmyz. Mundaı poıyz jolaýshylarǵa merekelik atmosferany syılap qana qoımaı, týrısterdi de tartýǵa múmkindik beredi», dedi Týrızm jáne sport mınıstriniń orynbasary Erjan Erkinbaev.
Aıta keteıik, byltyrǵy jańajyldyq elektr poıyzymen 16 myńnan astam jolaýshy tasymaldanǵan.
Merekelik poıyz quramy 28 jeltoqsannan bastap aptasyna bes ret qatynaıdy. Elordadan Býrabaı kýrortyna poıyz Nurly jol vokzalynan tańǵy saǵat 06:12-de jóneltiledi. Sonymen qatar elorda turǵyndary men qala qonaqtaryna yńǵaıly bolý úshin poıyzǵa Astana-1 vokzalynan da otyrǵyzý qarastyrylǵan. Bul jerge ekspress poıyz tańǵy saǵat 06:37-de kelip, 07:00-de júrip ketedi.
Týrıstik poıyzdy iske qosý aıasynda QR PIB «Býrabaı damý» JShS erekshe reıstiń kestesine sáıkes qysqa týr uıymdastyrdy. Jańajyldyq taqyrypty jalǵastyrý maqsatynda Býrabaıdaǵy Santa rezıdensııasyna baryp, Býrabaılandta tańǵajaıyp kún ótkizý usynylady. Munda buǵy nemese ıt jegilgen arbamen, kvadrosıklmen, qarda júretin kóliktermen serýendeýge, atqa minýge bolady.
