Foto: senate_kz
Senat otyrysynda depýtat Sovetbek Medebaev dıvıdendter tóleý máselesin kóterip, Saýda jáne ıntegrasııa vıse-mınıstri Qaırat Tórebaevqa suraq qoıdy. Senator óz saýalynda dıvıdentterdi ólsheý jáne esepteý úshin qandaı tetikter qoldanylatynyn naqtylaǵan edi. Degenmen, Q. Tórebaev bul másele óz mınıstrliginiń quzyryna jatpaıtynyn aıtyp, jaýapty jazbasha túrde beretinin jetkizdi.
Alaıda, Palata Tóraǵasy vıse-mınıstrdiń jumysqa mundaı salǵyrt bolmaý keregin eskertip, Senat otyrystaryna daıyndyqsyz kelýge bolmaıtynyn aıtty.
«Senator salyqqa ǵana emes, dıvıdendterge de qatysty suraq qoıdy. Sondyqtan aldaǵy ýaqytta osyndaı kezdesýlerge daıyndalyp kelińizder. Buǵan deıin suraq qoıǵan Alısher Satvaldıevtiń saýalyna da jazbasha jaýap beremin dedińiz. Endi osy máseleniń de óz mınıstrligińizge esh qatysy joq ekenin aıtyp otyrsyz. Siz búgingi otyrysqa Úkimetten bas spıker retinde shaqyryldyńyz. Sondyqtan áriptesterińizben máselelerdi aldyn-ala talqylap, sıfrlardy taldap, tyńǵylyqty daıyndalyp kelýińiz kerek edi», dedi Máýlen Áshimbaev.
