2024 jyly múmkindigi shekteýli jandardyń kúnine oraı (qazan aıynyń ekinshi jeksenbisi) áleýmettik kómek kelesi sanattaǵy azamattarǵa engizildi:
- birinshi toptaǵy múgedekterge – 20 aılyq eseptik kórsetkish (73 840 teńge);
- ekinshi toptaǵy múgedekterge jáne barlyq toptaǵy on segiz jasqa deıingi múgedek balalarǵa – 10 AEK (36 920 teńge);
- úshinshi toptaǵy múgedekterge – 5 AEK (18 640 teńge).
Sonymen qatar kelesi sanattaǵy azamattar Astana qalasyndaǵy mańyzdy datalar men merekeler úshin 2,5 AEK (9 230 teńge) kóleminde birjolǵy tólem alady:
- 4 aqpan (Dúnıejúzilik qaterli isikke qarsy kúres kúni) – áleýmettik mańyzy bar aýrýlary bar azamattar men qaterli isikteri bar balalar;
- 8 naýryz (Halyqaralyq áıelder kúni) – kópbalaly analar, sonyń ishinde az qamtylǵan otbasylar;
- 21–23 naýryz (Naýryz meıramy) – ata-anasynyń qamqorlyǵynsyz qalǵan balalar;
- 7 mamyr (Otan qorǵaýshylar kúni) – memleket aldyndaǵy erekshe eńbegi úshin zeınetaqy alatyn zeınetkerler;
- 31 mamyr (Saıası qýǵyn-súrgin qurbandaryn eske alý kúni) – saıası qýǵyn-súrgin qurbandary, saıası qýǵyn-súrginge ushyraǵan, múgedekter nemese zeınetkerler;
- 1 maýsym (Balalardy qorǵaý kúni) – jetim balalar;
- 29 tamyz (Semeı ıadrolyq synaq polıgonynyń jabylý kúni) – zeınetkerler men ıadrolyq synaqtar saldarynan keltirilgen zalal úshin birjolǵy ótemaqy alýshylar qatarynan Semeı ıadrolyq synaq polıgonyndaǵy ıadrolyq synaqtardyń saldarynan zardap shekken azamattar;
- 1 qazan (Qarttar kúni) – jasy boıynsha zeınetkerler men eń tómengi zeınetaqyny alýshylar;
- 1 jeltoqsan (Dúnıejúzilik JITS-ke qarsy kúres kúni) – adamnyń ımmýn tapshylyǵy vırýsyn tasymaldaýshylardy qosa alǵanda, adamnyń ımmýn tapshylyǵy vırýsy týdyrǵan aýrýmen aýyratyn azamattar.
Respýblıka kúni (25 qazan) ataýly áleýmettik kómek alýshylar 4,5 AEK (16 614 teńge) mólsherinde tólem alýǵa quqyly.
60 AEK (221 520 teńge) mólsherinde áleýmettik kómek 1986 jyly 17-18 jeltoqsandaǵy oqıǵalarǵa qatysýshylardyń arasynan saıası qýǵyn-súrgin qurbandaryna «Adamdardy ońaltý týraly» zańda belgilengen tártippen aqtalǵandarǵa taǵaıyndalady.
15 aqpanda «Ardagerler týraly» zańnyń 5-babynyń 2, 3, 4, 5-tarmaqtarynda kórsetilgen basqa memleketterdiń aýmaǵyndaǵy soǵys qımyldaryna qatysqan ardagerlerge jáne Aýǵanstandaǵy áskerı qyzmet kezinde alǵan jaraqaty nemese kontýzııasy saldarynan múgedek bolyp qalǵan áskerı qyzmetshilerge 45 AEK (166 140 teńge) kóleminde áleýmettik kómek kórsetiledi.
Osyǵan uqsas kólemdegi kómek 26 sáýirde Uly Otan soǵysy ardagerlerine jeńildikter boıynsha teńestirilgen ardagerlerge, sondaı-aq Chernobyl atom elektr stansııasyndaǵy apattyń zardaptaryn joıýǵa qatysqan basqa da tulǵalarǵa tólenedi.
Uly Otan soǵysy ardagerlerine jeńildikter boıynsha teńestirilgen ardagerlerge, sondaı-aq bekitilgen qaǵıdalardyń 16-tarmaǵynda kórsetilgen adamdardy qospaǵanda, basqa memleketterdiń aýmaǵyndaǵy soǵys qımyldaryna qatysqan ardagerlerge Jeńis kúnine birdeı mólsherdegi kómek taǵaıyndalady. Astana qalasy máslıhatynyń 2023 jylǵy 3 qazandaǵy sheshimimen Uly Otan soǵysy ardagerleriniń ózderi keminde bir mıllıon teńge járdemaqy alsa, eńbek ardagerleri 15 AEK (55 380 teńge) alýǵa quqyly.
Al, Eńbek jáne halyqty áleýmettik qorǵaý mınıstrligi bizge birjolǵy áleýmettik kómek kórsetýge arnalǵan este qalarlyq kúnder men merekelerdiń tizimi aımaqtarda ár túrli jáne belgili bir ákimshilik-aýmaqtyq birliktiń bıýdjettik múmkindikterine baılanysty ekenin aıtty.
«Jalpy, ákimdikter 21 este qalarlyq datalarda jáne mereke kúnderi áleýmettik kómek kórsetedi. Áleýmettik kómek alýshylardyń ótinishterin talap etpeı, ýákiletti organnyń nemese basqa uıymdardyń usynýy boıynsha ákimdikter bekitken tizim boıynsha kórsetiledi», dep túsindirdi mınıstrlik.
