Qoǵam belsendileriniń pikirinshe, bul qorshaǵan ortaǵa orny tolmas zııan keltirýi múmkin. Polısııa oqıǵaǵa baılanysty qylmystyq is qozǵady.
Almatynyń "Aqbulaq" shaǵyn aýdanynda 40-qa jýyq toǵyz qabatty úı, mektep jáne jaqyn mańdaǵy turǵyn úı keshenderine avtoturaq salý úshin 17 gektar aýmaqta jasyl alań túgeldeı shabylǵan. Qurylys kompanııasy aǵashtardy kesýdi 9 jeltoqsanda bastapty, birneshe apta ishinde 2800-ge jýyq aǵash kesilgen.
Qurylys kompanııasynyń málimetinshe, olardyń qajetti ruqsattary bar, buǵan deıin turǵyndarmen kezdesý de ótkizgen.
- Ruqsat alǵan boıda aǵashtardy kesýge kiristik. Biz munda turǵyn úı keshenin, oǵan qosa 1200 oryndyq mektep pen avtoturaq salýdy josparlap otyrmyz. Biz aldyn ala daıyndaldyq, munyń bárin turǵyndarmen 3-4 aı boıy talqyladyq. 3-4 ret kezdesýler boldy. Tek jınalys emes, barlyǵyn resmı túrde kýálandyrdyq, – dep jazdy KTK arnasy "Qazaq Stroy" JShS dırektorynyń orynbasary Darhan Marqumovtyń sózin.
Biraq belsendiler qurylys kompanııasynyń áreketimen kelispeıdi.
- Salmaý kerek. Jalpy alǵanda, mundaı qurylystardy toqtatý kerek. Prezıdent birneshe ret tapsyrma berdi. Alaıda Almatyda bul buıryq oryndalmaı jatyr. Másele bul zańsyzdyqtyń zańdastyrylǵanynda. Qurylysshynyń buzýǵa jáne aǵash kesýge ruqsaty bar eken, – deıdi qoǵam belsendisi Sanjar Boqaev.
Qurylys kompanııasynyń aǵashtardy kesýge ruqsaty bar ekeni belgili boldy. Alaıda ákimdik olardyń ruqsat etilgennen kóp aǵash keskenin aıtady.
- "Qazaq Stroy" JShS merdiger uıymy 176-ǵa jýyq aǵash pen 40 túp jabaıy butalardy, barlyǵy 216 birlik jasyl alqapty zańsyz keskeni anyqtaldy. Iаǵnı, bul ósimdikter ruqsat berý qujattarynda kórsetilmegen, – dedi Almaty qalasy ekologııa jáne qorshaǵan ortany qorǵaý basqarmasynyń bas mamany Nurken Aqmyrza.
Polısııa zańsyz aǵash kesý faktisi boıynsha qylmystyq is qozǵady. Zańdy túrde joıylǵan aǵashtarǵa keler bolsaq, kompanııa olardyń ornyna 28 myńǵa jýyq jańa aǵash otyrǵyzýǵa ýáde berdi.
