Qoǵam • 06 Qańtar, 2024

Májilis depýtaty Almaty qalasynyń kásipkerlerimen kezdesti

180 ret

kórsetildi

6 mın

oqý úshin

Májilis depýtaty Azat Perýashev Almaty qalasynyń kásipkerlerimen kezdesti. Onda depýtat «Nurtaý temir» zaýytynda sanepıdbaqylaý salasyndaǵy tásilderdiń ózgerýine baılanysty jabylyp qalý qaýpi tónip turǵan alty kásiporyn basshylarymen ózekti máselelerdi talqylady, dep habarlaıdy Egemen.kz Májilistiń baspasóz qyzmetine silteme jasap.

Aıana TOǴANBEK

Májilis depýtaty Almaty qalasynyń kásipkerlerimen kezdesti

«Memlekettik organdar bir jaǵynan kásiporyndardyń sanıtarlyq aımaǵynda turǵyn úıler men áleýmettik nysandar salýǵa ruqsat berse, ekinshi jaǵynan Densaýlyq saqtaý mınıstrliginiń jańa buıryǵy negizinde zaýyttarǵa sanıtarlyq aımaqtardy saqtaý talaptaryn kúsheıtedi. Sonyń saldarynan bıýdjetke mıllıardtaǵan salyq tólegen 200-den 700-ge deıin adamdy jumyspen qamtyp otyrǵan adal óndirister qazir barlyq sotta jeńilip, jabylý aldynda tur. Sonymen qatar Densaýlyq saqtaý mınıstrliginiń atalǵan buıryǵy «Normatıvtik quqyqtyq aktiler týraly» zańnyń birqatar normasyn tikeleı buzatyny anyqtaldy. Atap aıtqanda, salalyq zańda belgilengen talaptarǵa baǵynbaı, ótken kezeńde ornatylǵan qatynastardyń keri kúshi joqtyǵyn elemeıdi», dedi A.Perýashev.

«Aq jol» fraksııasy atalǵan kásiporyndardyń zańdy quqyǵyn qorǵaý úshin bul buıryqqa narazylyq bildirý talabymen Bas prokýrorǵa júginedi dep kelisti.

Odan keıin Indýstrıaldy-ınnovasııalyq damý alıansynyń jetekshilerin qabyldady. Alıans tóraǵasy, «Dolche-farm» farmasevtıkalyq kompanııasynyń ıesi Elena Lı, energetıka, jeńil ónerkásip, kólik jáne logıstıka, standarttaý salalyq komıtetteriniń jetekshileri jáne basqalar ekonomıkalyq damý problemalary týraly óz kózqarasyn bildirdi. О́ndiristi verıfıkasııalaý, kontrafaktilik ónimmen kúresý, ShOB óniminiń eksportyna járdemdesý, salyq daýlary (mámilelerdi jaramsyz dep taný), óndiristi jańǵyrtýǵa memlekettik qoldaý kórsetý jáne t.b. máseleler kóterildi. «Hımfarm» kompanııasynyń ókili bıyl 1 qańtardan bastap etıl (medısınalyq) spırtine aksız salyǵy engizilgenin synǵa alyp, bul barlyq farmasevtıkalyq ónimder baǵasynyń qymbattaýyna ákeletinin atap ótti.

«Medısınalyq spırt alkogol nemese benzın emes, ony asyp-tasqannan emes, muqtaj bolǵasyn qoldanady. Pandemııa kezinde dezınfeksııa zattarynyń jappaı óndirilýine baılanysty etıl spırtin qoldaný kúrt ósti, al, salyq organdary osydan aqsha tabý kerek dep sheshti», dep narazy boldy farmasevter.

Kásiporyndar da iri jobalarǵa jergilikti qamtý talaptaryn belgileý, sondaı-aq olardyń otandyq bıznestiń qatysýymen júzege asyrylýyn baqylaý máselesin kóterdi.

Sondaı-aq múgedek-kásipkerler qaýymdastyǵy (Ernar Sárseev) múgedek talapkerlerge birinshi sátsiz oqý jylynan keıin kelesi jyldary joǵary oqý oryndary men kolledjderde oqýǵa grantqa túsý úshin UBT-ny qaıta tapsyrý múmkindigin berý týraly usynystaryn aıtty.

Sonymen qatar sabaqqa qatysa almaıtyn múmkindigi shekteýli jandarǵa qashyqtan jumys isteýge múmkindik beretin IT salasy sııaqty jáne t.b. mamandyq boıynsha syrttaı oqytýǵa grant bólý qajet.

«Usynystyń barlyǵy eskeriletinin jetkizdim. Múmkindigi shekteýli jandardy oqytý jónindegi talaptarǵa kelsek, «Aq jol» fraksııasy zańnamaǵa mundaı túzetýler engizýge birden bastamashylyq etpek», dedi depýtat.

Odan ári depýtat qaýymdastyq basshysy Erbol Omarhanov bastaǵan jetekshi mıkroqarjy uıymdarynyń basshylarymen kezdesti.

Kásipkerler qaryz júktemesin azaıtýǵa qatysty zań jobasyna óz usynystaryn jetkizdi.

Atap aıtqanda, kepili bar nesıelerdi tutynýshylyq nesıeler sanatynan alyp tastaýdy usynyp otyr. Eń aldymen, áńgime avtonesıe týraly. Máselen, avtokólik satyp alýǵa berilgen nesıeler barlyq shaǵyn nesıeler kóleminiń 42 paıyzyn qurasa, sonyń ishinde merzimi ótken nesıelerdiń úlesi 1 paıyzdan az. Sonymen qatar qaryz alýshynyń qajet bolǵan jaǵdaıda mundaı nesıeni óteýine esh kedergi joq, óıtkeni kólik ótimdi kepil. Odan bólek, avtokólik túrindegi kepildi joǵaltý múmkin emes, óıtkeni mundaı satyp alý urlyqtan, jazataıym oqıǵalardan jáne t.b. mindetti saqtandyrýǵa jatady.

Ekinshi jaǵynan, zań jobasynda usynylǵan mundaı nesıeleýdiń kólemi men sharttaryna shekteý avtokólik satyp alý kólemin 60 jáne odan da kóp paıyzǵa qysqartýy múmkin. Avtokólik parkiniń eskirýi, sondaı-aq qoljetimdi avtokólikter naryǵynda otandyq óndiris úlgileriniń jetekshi róli jaǵdaıynda mundaı zardap halyq úshin de, kásiporyndar úshin de jaǵymsyz bolmaq.

Sondaı-aq sala ókilderi zań jobasyndaǵy buryn tólenbegen nesıesi bolǵan jaǵdaıda ekinshi shaǵyn nesıe alýǵa tyıym salýǵa qarsy shyqty.

«Bireý 10 myń teńgeni aldy da, ekinshi ret taǵy 10 myńdy ala almaıdy. Al bireý bir mezette 5 mıllıon nesıe alady. Qaısysynyń qaıtarylmaý qaýpi kóp? Árbir mundaı ótinim jeke qaralýy kerek, sebebi, jeke adamǵa jáne naqty jaǵdaıǵa baılanysty. Sheshimdi óz aqshasyn táýekelge baılaǵan nesıe berýshiniń óz erkinde qaldyrǵan durys dep esepteımiz», deıdi olar.

Klıenttiń qaryzyn 24 aıǵa deıin kollektorlarǵa ótkizbeý, ósimpuldy joıý jáne t.b. sııaqty shekteýler. Mıkroqarjy uıymdary ókilderiniń pikirinshe, jumys istemeıtin nesıeler boıynsha lımıtterdiń asyp ketýine ákep soǵyp, bıznesti joıýǵa májbúr etedi.

Bıznes qaryz júktemesiniń azaıýy zańdy nesıeleýdi shekteýmen ǵana emes, sonymen qatar, nesıeler qunynyń (paıyzdyń) azaıýymen, onyń ishinde mıkroqarjy uıymdarynyń ózderi úshin de, sondaı-aq eldiń tabystylyǵyn arttyryp, jumyspen qamtýdyń ulǵaıýymen baılanystyrý kerek dep sanaıdy.

Zań jobasy avtorlarynyń biri, vıse-spıker, «Aq jol» fraksııasynyń múshesi Danııa Espaevanyń qatysýymen taıaý ýaqytta taqyrypty talqylaýdy jalǵastyrýǵa kelisti.