Tarıhı óńirdegi mańyzdy talqylaý

Májilis spıkeriniń sapary oblys aktıvimen – Ardagerler keńesiniń múshe­leri, oblystyq máslıhat depýtattary já­ne jurtshylyqpen kezdesýden bastaldy.

Erlan Qoshanov ulytaýlyqtarmen kezdesýde Memleket basshysy Qasym-Jomart Toqaevtyń «Biz ozyq el retinde tek alǵa ǵana qaraýymyz kerek» degen «Egemen Qazaqstan» gazetine jýyrda ǵana bergen suhbatyndaǵy negizgi basymdyqtarǵa nazar aýdardy.

Májilis tóraǵasynyń aıtýynsha, ótken jyl elimiz úshin eleýli, mańyzdy oqıǵalarǵa toly boldy. Memleket basshysynyń keshendi reformalary jalǵasyp, jańa ekonomıkalyq saıasatty júzege asyrý bastaldy. Erlan Qoshanov mem­lekettegi barlyq deńgeıdegi ınstı­týsıonaldyq ózgeris týraly aıtyp, elimizdiń jetistikteri men jaqyn bolashaqqa arnalǵan josparlaryna keńinen toqtaldy. Ol álemdegi kúrdeli ahýalǵa qaramastan, ekonomıkanyń damýy 4,9 paıyz deńgeıinde qamtamasyz etilip, shetelden aýqymdy ınvestısııa tartylǵanyn atap ótti.

– Birneshe kún buryn Prezıdent qa­byl­daýynda boldym. Memleket basshysy óńirlerdiń damýyna basa mán berip otyr. Prezıdenttiń sheshimimen qaıta jańǵyrǵan Ulytaýdyń óńir úshin ǵana emes, ultymyz úshin de orny bólek. Osyǵan oraı Prezıdent oblys basshylyǵyna óńirde birqatar áleýmettik-mádenı nysan men jańa turǵyn úıler salý týraly tapsyrma berdi. Bul tapsyrmany oryndaý – bárimiz úshin basty mindet. De­pýtattar bul jumysty qadaǵalap, barlyq josparlanǵan jobanyń júzege asýyna jan-jaqty yqpal etedi, – dedi Májilis tóraǵasy.

Erlan Qoshanov búginde Ulytaý oblysy óz aldyna otaý tikken derbes, ekonomıkalyq, áleýmettik, mádenı damý áleýeti zor óńir ekenin aıtty. Oblysqa tartylǵan ınvestısııa aýqymy 171,2 mlrd teńgege jetip, ótken jylmen salystyrǵanda 45 mlrd-qa ósken. Qurylys jumystarynyń kólemi 85,6 mlrd teńgeni qurasa, paıdalanýǵa beril­gen turǵyn úı nysandary 67 myń sharshy metrdi quraıdy.

Sondaı-aq Májilis spıkeri 2022 jyly Prezıdenttiń bastamasymen eli­miz­degi alǵashqy Ulttyq quryltaı oty­­rysy da ult uıasy – Ulytaýda ótkenine nazar aýdardy.

– Ulytaý óńiriniń tarıhı jáne rýhanı orny bólek. Altyn Ordanyń negizin qalaǵan Joshy han da osynda jerlengen. El Prezıdenti keshegi suhbatynda bıyl Joshy ulysynyń 800 jyldyǵy atap ótiletinine arnaıy toqtaldy. Bul – óńir úshin ǵana emes, qazaq memlekettiliginiń tereń tarıhyn zerdeleý úshin de mańyzy zor is-shara, – dedi Erlan Qoshanov.

Odan ári depýtattar Jezqazǵan jylý elektr ortalyǵynda jylý berý maýsymynyń barysy men kásiporyndy jańǵyrtý jumystary týraly esepterdi tyńdady. Sonymen qatar jylý elektr ortalyǵy qyzmetkerlerine jylý jáne energetıka týraly jańa zań joba­sy boıynsha júrgizilip jatqan jumys­tardy aıtyp, suraqtarǵa jaýap berdi, energetıkterdiń usynystaryn tyńdady.

Sapar barysynda depýtattar Jez­qazǵan baıytý kombınatynda bolyp, Sátbaev qalasyndaǵy «Annenskaıa» keni­shine tústi. Erlan Qoshanov kásiporyn qyzmetkerlerimen kezdesýde Memleket basshysynyń ózekti máse­lelerdi sheshý jónindegi tapsyrma­laryn júzege asyrýǵa baǵyttalǵan zańna­malyq bastamalarǵa toqtaldy. Atap aıtqanda, zııandy eńbek jaǵdaıynda jumys isteıtin azamattar úshin arnaıy tólem engizý jáne óndiris­tegi eńbek qaýipsizdigin kúsheıtý jónindegi túzetýler týraly aıtyp berdi. Depýtattar jumysshylarmen jáne kenshilermen memleket tarapynan olar­dyń áleýmettik qoldaýyn jaqsartý týraly máselelerdi talqylady.