foto: Turar Qazanǵapov
Astana halyqaralyq áýejaıynyń habarlaýynsha, aerodrom qyzmetkerleri qolaısyz aýa raıynda da jumys isteıdi.
«10 qańtarda daýyldy eskertý jarııalandy. Saǵat 14:00 men 20:00 aralyǵynda jeldiń jyldamdyǵy sekýndyna 22 metrden 27 metrge deıin jetýi múmkin. Mundaı aýa raıynda reıster toqtatylýy nemese keshiktirilýi múmkin», dep habarlady Astana halyqaralyq áýejaıynyń baspasóz qyzmeti.
Áýejaı ókili aerodromda qalyń qar jaýyp, jeldiń jyldamdyǵy 10 m/s, jel ekpini 15 m/s jetkenin túsindirdi.
«Búginde elorda áýejaıynda 75 reıs josparlanǵan. 7 reıs áýe kompanııalarynyń tehnıkalyq sebepterine baılanysty keıinge qaldyryldy. Aýa raıynyń qolaısyzdyǵyna baılanysty reısterdiń keshigýi nemese toqtatylýy tirkelgen joq», dep qosty baspasóz qyzmeti.
Sondaı-aq aerodromdy qalyń qardan tazartý jumystary jalǵasyp jatqany aıtyldy. Qazir bul jumysqa 10 birlik arnaıy tehnıka jumyldyrylǵan.
