Sýretti túsirgen Dmıtrıı Erofeev
Kúmis kúlkisi syńǵyrlaǵan jas óskinder men ǵumyryn bilim jolyna arnap kele jatqan ustazdar qaýymy, ata-analar qýanyshty sátke kózaıym bolyp, mekteptiń ashylý saltanatyn asqaq kóńilmen ótkerdi. Jetisýlyq zııaly qaýym, el jaqsylary men shahar turǵyndary qatysqan №30 orta mekteptiń ashylý saltanatynda alǵashqy bolyp oblystyq bilim basqarmasynyń basshysy Marat Súleımenov sóz aldy.
«Memleket basshysy óskeleń urpaqtyń tereń bilim, tálimdi tárbıe alýyna barlyq jaǵdaı jasaýdy mindettedi. Soǵan oraı elimizde, sonyń ishinde óńirimizde de bilim salasyn damytýǵa barynsha qoldaý kórsetilip jatyr. «Jaıly mektep» ulttyq jobasy aıasynda oblysta 7 mektep, sonyń 3-ýi Taldyqorǵan qalasynda salynady. Sol sııaqty ótken jyly 10 bilim nysanynyń qurylysyn aıaqtaý josparlanǵan, sonyń biri – osy Yntymaq aýylyndaǵy búgin esigin aıqara ashyp otyrǵan 1200 oryndy bilim ordasy», dedi M.Súleımenov.
Búginde mektepke 661 oqýshy qabyldandy, 31 klass komplektisi ashyldy. Onyń ishinde, О́tenaı aýylyndaǵy №21 orta mektepten 13 synyp, 345 oqýshy kóship kelgen. Olar jetekshisimen jańa mektepke birge aýysyp, oqýshylardy tasymaldaý máselesi sheshildi. Sonymen qatar pedagogterge 30 bos oryn jáne 20 kishi qyzmetkerge konkýrs jarııalanyp, qabyldanýda.
О́z kezeginde sóz alǵan ardager ustaz Mınýar Baımoldanova da bilim men óner turǵysynda óreli oılaryn aıshyqtap, izgi tilegin arnady. Kelesi kezekte mektep qurylysyna jaýapty merdiger kompanııa «Gýnn Stroı Servıs» JShS bas dırektory Sábıt Qalımoldaev jańa nysannyń kiltin mektep dırektory Sáýle Úsenovaǵa tabys etti. Án asqaqtap, bı bılengen shara barysynda mektep lentasyn oblystyq bilim basqarmasynyń basshysy M.Súleımenov pen ardager ustaz M.Baımoldanova qıdy.
Jańadan ashylǵan mektep zamanaýı talapqa saı jabdyqtalǵan. Oqýshylardyń sapaly bilim alýyna barlyq múmkindikter jasalǵan. Mektepte 50 oryndy oqý zalymen kitaphana, sport zal, gımnastıkalyq zal, 405 oryndy ashana, 390 oryndy májilis zaly, 2 fızıka, 2 hımııa, 2 bıologııa jańa modıfıkasııalyq kabınet, 4 mýltımedııalyq kabınet, 2 uldar sheberhanasy, 2 qyzdar sheberhanasy bar. Sonymen qatar barlyq pán kabınetteri qajetti ádistemelik, tehnıkalyq quraldarmen jabdyqtalǵan.
Adamnyń jaqsy bolmaǵy ata-ana, ustaz ben ómir súrgen ortasyna baılanysty ekenin Abaı babamyz aıshyqtap ketken. Búginde hakim aıtqan úshtaǵandy tárbıeni nyqtaý ózekti másele. Bul rette bilim oshaqtarynyń mańyzy zor. Endeshe ult pen urpaq bolashaǵy úshin boı kótergen osyndaı záýlim rýhanı ǵımarattar kóbeıe bersin demekpiz.
Jetisý oblysy
