Jyl sońynda oblys ortalyǵynda «Túrkistan bilim-ınnovasııa» lıseı-ınternatynyń jańa ǵımaraty paıdalanýǵa berildi. «Bilim-ınnovasııa» lıseıleri sapaly bilimi men myqty kórsetkishteri arqyly elimizge tanylyp úlgergen. Memleket myqty bolýy úshin bilim túzelýi kerek. Sondyqtan biz osy salany damytýǵa barlyq múmkindikti qarastyryp jatyrmyz. Osyndaı úlgidegi mektepterdi aýylǵa deıin jetkizýdi josparlap otyrmyz. Kez kelgen aýyldyń mektebi jarqyrap-jaınap turýy kerek, ustazdary da myqty bolýy qajet. Árbir urpaq úshin sapaly bilim qoljetimdi bolýǵa tıis jáne elimizdegi mektepter bilim-ınnovasııa lıseıleri sııaqty jumys isteýi qajet», dedi is-sharaǵa qatysqan Oqý-aǵartý mınıstri Ǵanı Beısembaev ashylý saltanatynda.
Oblys ákimi Darhan Satybaldy «Túrkistan bilim-ınnovasııa» lıseı-ınternaty oblystyq mektepter reıtınginde – 1-orynda, respýblıkada 28-orynda turǵanyn, sondyqtan jańa ǵımarat salyp berý jón sanalǵanyn aıtty. «Aldaǵy ýaqytta bilim uıasyna árbir aýdan, qalanyń bilimdi oqýshylaryn shoǵyrlandyrý josparlanyp otyr. Sonymen birge basqa aýdan, qalalarda da osyndaı lıseılerdi jasaqtaý kózdelgen», dedi ákim. 700 oryndyq mektep zamanaýı oqý quraldarymen, pán kabınetterimen, jataqhanamen qamtylǵan. Buryn Kentaýdaǵy ǵımaratta oqyǵan oqýshylar endi osy jańa ǵımaratta bilim alady. «Bilim-ınnovasııa» lıseı-ınternatynda barlyǵy 416 oqýshy bar. Jańa oqý jyly 7-synypqa – 150 oqýshy, 8-synypqa 75 oqýshy qabyldanǵan. Lıseı-ınternatta 43 pedagog jumys isteıdi. Olımpıadalar men ǵylymı joba konkýrstarynyń respýblıkalyq kezeńine 26 oqýshysy qatysyp, 7-i jeńimpaz atanǵan.
Sondaı-aq Jetisaı qalasynda 300 orynǵa arnalǵan, tolyqtaı zamanaýı materıaldyq-tehnıkalyq bazamen jabdyqtalǵan bilim uıasy paıdalanýǵa berildi. Jetisaıdaǵy bul mekteptiń qurylysy toqtap, merdigerdiń salǵyrt isi osydan eki jylǵa jýyq ýaqyt buryn sotqa ótken bolatyn. Keıin qaıta ótkizilgen konkýrstyń nátıjesinde qurylysty «Taımas» kompanııasy qolǵa alyp, eki aýysymda tynymsyz jumys júrgizgen. Nátıjesinde, 2024 jyly tapsyrylýǵa tıis 300 oryndyq mektep 9 aıda qoldanysqa berildi. Jalpy quny 1,4 mlrd teńge bolatyn Sh.Ýálıhanov mektebinde III toqsannan bastap 562 oqýshy bilim alyp jatyr. Uzaq ýaqyt ózge mekteptiń ǵımaratynda bilim alyp kelgen Sh.Ýálıhanov mektebiniń oqýshylaryna sońǵy úlgidegi tehnologııalarmen jabdyqtalǵan fızıka, hımııa, ınformatıka, mýltımedıalyq jáne lıngafondyq kabınetterde sapaly bilim alýyna barlyq jaǵdaı jasalǵan. Sonymen qatar munda sport zaly, zerthana kabınetteri men tigin sheberhanasy da bar. Búginde aýdandaǵy jalpy bilim beretin 84 mekteptiń 74-i – memlekettik, 10-y – jekemenshik. Oqý ordalaryndaǵy 45 526 oqýshyǵa 5 526 pedagog bilim beredi.
Byltyr qarashada Oqý-aǵartý mınıstrligi men oblystyq bilim basqarmasynyń birlesken buıryǵy negizinde óńirdegi 5 aýdan men qaladaǵy 235 memlekettik orta bilim berý uıymynda keshendi monıtorıng jumystary júrgizilip, birqatar júıeli kemshilik anyqtalǵan edi. Bul jóninde Túrkistanda bilim salasyndaǵy ózekti máseleler talqylanǵan májiliste Oqý-aǵartý mınıstrligi Bilim salasynda sapany qamtamasyz etý komıtetiniń tóraǵasy Elnur Dáýenov aıtyp berdi. Al mınıstr Ǵ.Beısembaev Túrkistan óńiriniń áleýeti zor ekenine toqtalyp, bilim salasy qyzmetkerlerin aýyzbirshilikpen jumys isteýge shaqyrdy.
Oblys ákimi D.Satybaldy bilim salasyna qoldaý kórsetý, bilimdi urpaq tárbıeleý eń basty mindet ekenin jetkizdi. О́ńirde bilim sapasyn jaqsartý, materıaldyq bazany jańartý, mektepter salý, «Qaýipsiz mektep» jobasy aıasyndaǵy jumystardy baıandap, bilim salasy qyzmetkerlerine úlken jaýapkershilik júktelip otyrǵanyn málimdedi. «Túrkistan oblysy bıýdjetiniń 48,2 paıyzy bilim salasyna bólinip otyr. Memleket basshysy Qasym-Jomart Toqaev mektep tapshylyǵyn joıý, oqýshylardyń alańsyz bilim alýyna jaǵdaı jasaý jóninde tapsyrma berdi. Osy maqsatta oblysta 2023-2025 jyldar aralyǵynda 96 mektep salynady. Oblysta balalardy qorǵaý, áleýmettik qoldaý maqsatynda naqty sharalar qabyldanyp, bıýdjet shyǵystary esebinen 12 mlrd teńge qarastyryldy. «Qaýipsiz mektep» jobasy aıasynda balalar qaýipsizdigin qamtamasyz etýge 5,9 mlrd teńge bóldik. Mektepterge 7 myńnan astam beınekamera ornatylyp, polısııa departamentiniń jedel basqarý ortalyǵyna qosyldy. Memlekettik 938 bilim berý mekemesi 100 paıyz dabyl batyrmasymen qamtylyp, jedel basqarý ortalyǵyna qosyldy. 573 bilim berý uıymy tolyq lısenzııalanǵan kúzet qyzmetine ótti. Jańa oqý jylynan bastap oblystaǵy bastaýysh synypta oqıtyn oqýshylar túgeldeı ystyq tamaqpen qamtamasyz etildi. Oǵan byltyr oblystyq bıýdjetten 6,2 mlrd teńge qarjy qarastyryldy», dedi D.Satybaldy.
Aıta keteıik, oblystaǵy 1 032 mektepte 520 myńǵa jýyq oqýshy bilim alyp jatyr. Al 1 409 balabaqshada 157 myńǵa jýyq bala tárbıelense, óńirdegi 52 kolledjde 40 myńnan astam stýdent oqıdy.
Túrkistan oblysy
