Dinmuhamed Qonaevty jas urpaqqa tanystyrý maqsatynda ártúrli jınaqtar jaryq kórip keledi. Byltyr ǵana «Ol kim?» serııasy boıynsha «Mazmundama» baspasynan «Dinmuhamed Qonaev kim?» atty kitapsha jaryq kórgen edi. Jınaqta Dımash Ahmetulynyń ómiri men qyzmeti jaıly balalar bilýge tıis málimetter jan-jaqty qamtylǵan. Kitapsha avtory Serikbol Hasan jınaqtyń balalar úshin mańyzy joǵary ekenin atap ótti.
– Bul kitaptyń maqsaty – balalarǵa Dinmuhamed Qonaevtyń ómir jolyn, eki ret úkimet, eki ret memleket basqarǵan eńbegin túsinikti etip jazyp shyǵý bolatyn. Irgeli kezdesýleri men úlken óndiris oryndaryn salýy sekildi tarıhı oqıǵalardy da qamtýǵa tyrystyq. Jalpy, bul jınaq – Qonaevtyń eki kitaby, basqa da tulǵa jóninde estelik kitaptardy sholyp oqyp shyǵyp, sol kitaptardyń negizinde balalarǵa laıyqtap qaıta jazylǵan dúnıe. Jalpy muny erekshe jańalyǵy bar zertteý kitap emes, balalarǵa arnalǵan tanymdyq kitapsha dep aıtsaq bolady. Jalpy, «Ol kim?» serııasy boıynsha tórt kitapqa avtorlyq ettim», – deıdi avtor.
Al belgili qalamger Oraz Qaýǵabaı «Qonaevtyń 12 qasıeti» kitabynda ál-Farabı danalyǵy boıynsha kemeńger patshaǵa tán «12» qasıettiń degdar tulǵanyń boıynda túgel toǵysqanyn taratyp jazady.
– Ál-Farabıdiń danalyǵynda kemeńger basshy óziniń súıek-syny, syrtqy tulǵasy arqyly erekshe kórinýi kerek. Iаǵnı ol adam óte symbatty «minsiz, músindeı ádemi, ımanjúzdi bolýǵa tıis». Dımekeń jaratylysynan kórikti, boıshań jáne júzinen nur tógilip turatyn ımanjúzdi kisi edi. Keńestik dáýirdegi memleket qaıratkerleriniń ishindegi eń symbatty, boı jaǵynan da, oı jaǵynan da erekshe bólek tulǵa Dımekeń ekeni belgili. Ekinshi qasıeti týraly Ál-Farabı ol adam «ózine aıtylǵan sózdiń bárin tereń túsinetin jáne istiń jaı-jaǵdaıyna sáıkes jan- jaqty tez uǵyp alatyn asa zerek bolýy kerek» deıdi. Dımekeńniń zerektigi men bárin bilip, sezip turatyn aıryqsha qasıeti jóninde qasynda júrgen serikteri qazirge deıin tańdana aıtady,– deıdi avtor kitabynda.
Sonymen qatar jınaqta D.Qonaevtyń Qapshaǵaı sý qoımasyn salýdaǵy batyl sheshimi, Medeý shatqalyna baılanysty táýekelderi, halqy úshin bárine barýǵa daıar shynaıy ult perzenti ekeni keńirek jazylǵan.
Aqıqat qartaımaıdy. Ol bolashaqqa jańa, saf kúıinde jetip ózinen qazyna taratpaq. Bizdińshe, Qonaev qazynasy – áli tolyq ashylmaǵan, tıisinshe zerdelenbegen bekzat dúnıe.
