Foto: stv portalynan
«Qazaqstan halqyna» QQ qaıyrymdylyq baǵdarlamalary men jobalaryn iske asyrý týraly» másele qozǵalǵan dóńgelek ústelde Bolat Jámishev aǵza almastyrý baǵytynda qordan qarjy emes qoldaý suraǵan dárigerlerdiń sózin tilge tıek etti.
«Dárigerler qordan aqsha qajet emes, elimizde máıit donorlyǵy qaıta jumys isteıtindeı etip zańdy ózgertý kerek deıdi. Konferensııa ótkizdik. Úkimetti jáne qoǵamdy transplantasııa jáne máıit donorlyǵy týraly zańdy ózgertýge áli de yntalandyrýdy kózdep, Densaýlyq saqtaý mınıstrligimen birge osy konferensııaǵa qatystyq», dedi Bolat Jámishev.
Telearnanyń dáıeginshe, qazirgi tańda elde 4 myń pasıent aǵza transplantasııasy boıynsha kezeginiń jetýin úmitpen kútip otyr.
Olardyń qaraılaıtyn baǵyty kóz jumǵan adamnyń organızmderin alý zań boıynsha rettelgen elder.
«Qazaqstan halqyna» qory shet elden aǵza aldyrý quny qymbat bolǵandyqtan, qarjy barlyǵyna jetpeıtinin alǵa tartyp, eldegi zańdy qaıta ekshep, ózgerister engizýge múddeli bolyp otyr.
«Halyq densaýlyǵy jáne densaýlyq saqtaý júıesi týraly» Kodekste tiri adamdar da donor bola alatyny belgilengen.
Elimizde tiri kezindegi donordan aǵzany (aǵzanyń bóligin) aýystyryp salý týraly sheshimdi Etıkalyq komıssııa qabyldaıdy.
Komıssııa bekitken talapqa saı tiri kezinde myna tizimdegi adamdar ǵana donor bola alady:
- 18 jastaǵy jáne osy jastan asqan azamattar;
- áreketke qabiletti adamdar;
- aǵzasyn (aǵzasynyń bóligin) jáne tinderin (tininiń bóligin) odan ári transplantattaý úshin alýǵa jazbasha notarıýs boıynsha kýálandyryp, kelisimin bildirgen tulǵa;
- aǵzasyn (aǵzasynyń bóligin) alý densaýlyqtyń birjola buzylýyna alyp kelmeıtini rastalatyn jan-jaqty medısınalyq zerttep-qaraýdan ótken adam.
Aıta keteıik, qaıtys bolǵan adamnyń aǵzasy donor retinde beriletin bolsa 7 adamnyń ómirin qutqarý múmkindigi paıda bolady.
