Foto: Vedomstvo. Telegram
Basketboldan Qazaqstan quramasy byltyr Qytaıdaǵy Azııa oıyndarynda jankúıerlerdiń senimin aqtaı almaı, úzdikter qatarynan kórine almaǵan. Sonymen qatar erler arasyndaǵy 5h5 quramasy Parıj Olımpıadasyna joldama beretin irikteý jarystarynda sátsiz nátıje kórsetip, joldamadan qaǵylǵan. Al 3h3 basketboly boıynsha áli bir irikteý jarysy bar. Bıylǵa josparlanǵan olımpıadalyq irikteý básekesinde lısenzııaǵa top jarǵan komanda ǵana ıelik etpek.
Basketbol – álemdegi eń tanymal sport túriniń biri ekendigin, elimizde 400 myńnan astam adam osy sport túrimen shuǵyldanatynyn, 16 oblystaǵy balalar men jasóspirimder sport mektebinde 156 bólimshe jumys isteıtinin aıtqan mınıstr Ermek Marjyqpaev: «Statıstıka boıynsha basketbolmen aınalysýshylar sany jyl saıyn artyp jatqanymen, ulttyq quramanyń nátıjesi tómendep barady. Táýelsizdik alǵannan beri Azııa chempıonattary nátıjelerine kóz júgirter bolsaq, 5h5 basketboldan áıelder quramasy eshqashan úzdik 5 komandanyń qataryna enbegen. Erler arasyndaǵy 5h5 basketboldan Qazaqstan quramasy birde-bir ret álem chempıonatyna qatysa almady. Azııa chempıonattaryndaǵy eń úzdik nátıje – 4-oryn. Onyń ózi 2007 jylǵy kórsetkish. Ulttyq quramanyń ortasha jasy – 33», dedi.
Jıyn barysynda mınıstr basketbol federasııasy basshylyǵyna ulttyq quramalardyń jattyqtyrýshylaryn qysqa merzimde bekitýdi, Halyqaralyq uıymdardaǵy ókildikti ulǵaıtý jáne halyqaralyq deńgeıdegi sport tóreshilerin daıarlaý jónindegi jumysty jandandyrýdy tapsyrdy. Sondaı-aq ulttyq qurama oıynshylarynyń ortasha jasyn tómendetip, sportshylardy daıarlaýda jańa ádistemelik tásilderdi engizý múmkindigin qarastyrý qajet ekendigin mindettedi.
