Foto: Senat
Otyrys barysynda Senat depýtattary «Táýelsiz Memleketter Dostastyǵyna qatysýshy memleketterdiń aýmaqtaryn sanıtarııalyq qorǵaý salasyndaǵy yntymaqtastyq týraly kelisimdi ratıfıkasııalaý týraly» zańdy qarap, maquldady. Kelisim taraptarǵa densaýlyq saqtaý salasyndaǵy qaýipsizdikti qoldaýǵa qatysty halyqaralyq mindettemelerdi oryndaýǵa múmkindik beretin erejelerdi bekitýge arnalǵan.
Zań TMD-ǵa múshe elderdiń memlekettik sanıtarlyq-epıdemııaǵa qarsy is-sharalaryn júrgizý kezinde yntymaqtastyq pen ózara is-qımyldy keńeıtýge yqpal etýdi kózdeıdi. Bul, birinshi kezekte, halyqaralyq medısınalyq-sanıtarlyq erejelerge sáıkes densaýlyq saqtaý júıesinde tótenshe jaǵdaılar týǵyzýy múmkin juqpaly aýrýlardyń taralýyn boldyrmaýǵa qatysty ekenin atap ótken jón.
Sondaı-aq Palata otyrysynda «1999 jylǵy 4 maýsymdaǵy О́nertabystardy quqyqtyq qorǵaý salasynda memleketaralyq qupııalardyń saqtalýyn ózara qamtamasyz etý týraly kelisimniń qoldanysyn toqtatý týraly hattamany ratıfıkasııalaý týraly» zań qaralyp, maquldandy. Hattamaǵa sáıkes, máseleniń ózekti bolmaýyna baılanysty TMD elderi KSRO kezindegi ónertabystardyń qupııalylyǵyn qamtamasyz etýdi toqtatady.
Sonymen qatar depýtattar «Qazaqstan Respýblıkasynyń Úkimeti men Fransýz Respýblıkasynyń Úkimeti arasyndaǵy jahandyq jylynýǵa qarsy kúres salasyndaǵy yntymaqtastyqty iske asyrý týraly arnaıy kelisimdi ratıfıkasııalaý týraly» zańdy da maquldady. Atalǵan zańnyń normalary jańartylatyn energııa kózderi salasyndaǵy iri jobalardy ilgeriletý, ázirleý jáne iske asyrý, elimizdiń aýmaǵynda ornyqty damý arqyly memleketterdiń ózara is-qımylyn nyǵaıtýǵa baǵyttalǵan. Bul taraptardyń energetıkalyq qaýipsizdik salasyndaǵy maqsattaryna, basymdyqtary men mindettemelerine qol jetkizýge, ekologııalyq taza tehnologııalarǵa kóshýge jáne shyǵaryndylardy azaıtýǵa yqpal etetin jobalarǵa qatysty bolmaq.
«Qazirgi tańda álem elderi jahandyq jylyný máselesine basa mán berip otyr. Bizdiń elimizde de qorshaǵan ortany saqtaýǵa arnalǵan naqty sharalar iske asyrylyp jatyr. Memleket basshysy Qasym-Jomart Kemeluly Toqaev taıaýda Dýbaıda ótken klımat jónindegi sammıtte Qazaqstan metan qaldyqtaryn azaıtý jónindegi jahandyq mindettemege qosylatynyn málimdedi. Búgin qaralǵan arnaıy kelisim elimizde jańartylatyn energııa salasyndaǵy iri jobany iske asyrýdy kózdeıdi. Jalpy, zańdy júzege asyrý Qazaqstanda «jasyl» energııanyń úlesin arttyrýǵa múmkindik beredi dep senemiz», dedi Senat Tóraǵasy.
Otyrys kezinde senatorlar depýtattyq saýaldaryn joldady.
Olga Býlavkına Úkimetti Beloýsov ken ornyn joıý jobasyna saraptama júrgizýge shaqyrdy. Sebebi jergilikti halyq mundaı qadam aımaqtyń ekologııasyna jáne aýyl turǵyndarynyń densaýlyǵyna keri áserin tıgizedi dep shaǵymdanyp otyr.
Janbolat Jórgenbaev iri qara maldyń terisin óńdeýge qatysty problemalarǵa nazar aýdaryp, bul másele aýyl sharýashylyǵy ónimderin óndirýshilerdi alańdatyp otyrǵanyn atap ótti. Depýtattyń aıtýynsha, atalǵan túıtkildi bylǵary óndiristerin jáne jartylaı juqa jún óńdeıtin iri kásiporyndar qurý arqyly jaqsartýǵa bolady.
Ernur Áıtkenov Ertis ózenindegi sýdyń azaıýyna jáne Q.Sátbaev atyndaǵy arnada bógettiń buzylýyna baılanysty alańdaýshylyq bildirdi. Depýtat Úkimetti osyǵan oraı jedel sharalar qabyldaýǵa shaqyrdy.
Talǵat Júnisov arnaýly bilim berý uıymdarynyń, onyń ishinde ońaltý ortalyqtarynyń tárbıeshilerine qosymsha aqy tólenbeıtinin, sodan týyndaıtyn máselelerdi tilge tıek etti. Senator atap ótkendeı, óńirlerde psıhologııalyq-medısınalyq-pedagogıkalyq konsýltasııalar ortalyqtary jetispeıdi.
Darhan Qydyráli sheteldikter asyrap alǵan qazaqstandyq balalardyń jaǵdaıyna monıtorıng júrgizý máselesine Úkimettiń nazaryn aýdardy.
Álı Bektaev Naýryzdy toılaý dástúrin nyǵaıtý úshin ıdeologııalyq negiz qalyptastyrýdy jáne ony dáripteýdi usyndy.
Evgenıı Bolgert bıznesti ózin-ózi retteýdi jetildirý qajet ekenin aıtyp, bul baǵytta birqatar shara usyndy.
