Basqarma basshysy Ǵanı Maılybaevtyń aıtýynsha, 2023 jyly haıýanattar baǵyndaǵy 25 túrli janýardan 80 tól alynǵan. Olardyń arasynda kógildir qoı, Shetlend ponıiniń qulyny, kengýrý, kirpi, lemýr, teńbil buǵy, úı qodasy, Chapman zebrasy, sý sıyr, qozyqumaı, qumaı, japon tyrnasy, taý qazy, afrıkalyq ýly sur jylan, shyǵys kolobýsy jáne t.b. bar.
Ásirese mundaǵy «Pýrga» atty aq kirekeı kóptiń nazaryn aýdarǵan. Qazir ol 6 jasta, eki basseıni bar jarty gektarǵa jýyq keń qorshaýda turady.
«Biz bul oqıǵany uzaq kúttik. Aq qonjyqty izdeýge jáne ony Almatyǵa jetkizý týraly kelissózderge eki jarym jylǵa jýyq ýaqyt ketti. Aqyry aq kirekeıdi tegin aldyq. Qazir Shvesııa haıýanattar baǵynyń birimen «Pýrganyń» jubyn ákelý úshin kelissózder júrgizip jatyrmyz», deıdi Ǵanı Maılybaev.
Máselen, byltyr zoobaqta begemot tóldedi. Bul sońǵy 18 jylda bolmaǵan jaıt. Sondaı-aq haıýanattar baǵynyń tarıhynda alǵash ret shyǵys kolobýsynan tól alynǵany da – mańyzdy oqıǵanyń biri.
«Búginde Almaty haıýanattar baǵyna kelýshilerge unaǵan «Pasha» deıtin erkek shımpanze ótken jyly «Lola» atty jubyn tapty, ol da «Pýrgý» sııaqty Máskeýden ákelingen. Alǵashynda maımyldar bólek ómir súrip, bir-birin syrttan baqylap júrdi. Qazir olar bir-birine úırenisip ketti. Dál osyndaı Amýr jolbarysyna da jup tańdaldy», deıdi haıýanattar parkiniń mamandary.
Sonymen qatar haıýanattar baǵy Grant zebralarymen tolyǵyp otyr. Olar pil, sýsıyr jáne bókendermen birge 2024 jyldyń sońynda qurylysy bastalatyn «Afrıka savannasyn» mekendeıtin bolady.
Búgingi tańda Almaty haıýanattar baǵynda 3 900-ge jýyq janýar bar. Úlken qurlyqtyń úzdik tórttigi sanalatyn azııalyq pil, begemot, Ońtústiktiń aq múıiztumsyǵy men Ońtústik Afrıka kerigi kórermender aıryqsha nazar qoıyp tamashalaıtyn janýarlar qatarynda. Sonymen birge aqıyq, tazqara, qaraqus, búrkit, ıtelgi, dala qyrany sekildi Qyzyl kitapqa engen sırek qustardyń balapandary kishkentaı kelýshilerdi yntyqtyra túsedi.
Aıtpaqshy, byltyr haıýanattar baǵynyń mamandary Raıymbek aýdany Sarybastaý aýylynyń mańynda álsiregen erkek qar barysyn qutqardy. Úsh aıǵa jýyq emdeýden jáne kútimnen keıin janýar Ile-Alataý ulttyq saıabaǵynyń aýmaǵyna jiberildi.
ALMATY
