Foto: Aqorda baspasóz qyzmeti
«Qazaqstan men Reseı arasyndaǵy jan-jaqty qatynastarǵa tyń serpin berý turǵysynan alǵanda búgingi saparyńyzdyń máni zor. Biz ındýstrııa, agroónerkásip kesheni jáne gýmanıtarlyq salalardaǵy baılanystarymyzdy ártaraptandyrý úshin barynsha kúsh salamyz», dedi Memleket basshysy.
Prezıdent birqatar kelisimniń, sonyń ishinde úkimetter deńgeıinde qol qoıylǵan Yntymaqtastyqtyń 2023-2024 jyldarǵa arnalǵan jol kartasynyń tabysty júzege asyrylyp jatqanyna nazar aýdardy.
Memleket basshysy elimizdiń óńirleri men Bashqurtstan arasyndaǵy taýar aınalymynyń qarqynyn oń baǵalady. Byltyrǵy 11 aıdyń qorytyndysy boıynsha saýda-sattyq deńgeıiniń kórsetkishi 350 mıllıon dollardan asty. Bul rette Qazaqstan Bashqurtstan Respýblıkasynyń jetekshi saýda seriktesteriniń úshtigine kiredi.
О́z kezeginde Radıı Habırov qazaq jerinde qonaqjaılyq kórsetkeni úshin Qasym-Jomart Toqaevqa alǵys aıtty.
«Bashqurtstan men Qazaqstan arasyndaǵy qarym-qatynasty damytýǵa erekshe mán beretinińizdi bilemiz. Menimen birge úlken delegasııa keldi. 2-3 jyldyń ishinde biz taýar aınalymy men ónerkásip kooperasııasynyń kólemin aıtarlyqtaı ulǵaıttyq. Búgin «Qazaqstan – Bashqurtstan» forýmyn ashtyq. Biz úshin Qazaqstan – eń basty seriktes. Biz munda ózimizdi erkin sezinemiz», dedi Radıı Habırov.
Kezdesýde saýda-ekonomıkalyq, mádenı-gýmanıtarlyq, ónerkásip jáne ózara múddeni kózdeıtin basqa da salalardaǵy yntymaqtastyqty jandandyrýǵa basa mán berildi.
