Biliktiliktiń birlesken jobasy

Dúnıejúzilik bank pen Ǵylym jáne joǵary bilim mınıstrligi qoldaý kórsetken aýqymdy jobanyń maqsaty – pedagogıkalyq oqytýdyń jetildirilgen modelin engizý jáne 30 bilim berý baǵdarlamasyn jańa úlgige beıimdeý. Sondaı-aq pedagogıkalyq ýnıversıtetterde muǵalimderdi daıarlaý baǵytyn transformasııalap, sol arqyly mu­ǵalimderdiń rólin, mártebesin kóterý kózdelgen. Sarapshylardyń aıtýynsha, qazirgi kezde bilim alýshynyń nazaryn aýdarýǵa umtylatyn básekelester kóp. Sondyqtan oqytýshylar óz quzyrettiligi men kásibı deńgeıin arttyrýy kerek.

– Mınıstrlik ótken jyl boıy mu­ǵa­limderdiń bilimin arttyrý boıyn­sha úlken jumys atqardy. Jeke tujy­rym­dama qabyldandy. Pedagogıkalyq ýnı­versıtetterdiń arnaıy jumys toby Nazarbaev ýnıversıtetpen bir­lesip, osy tujyrymdama aıasynda Dúnıejúzilik bank jobalaryn júzege asyrýǵa qatysqan Fınlıandııadan kelgen seriktestermen jumys istedi. Qazir jobany aýqymdy júzege asyrý kezeńi – joǵary oqý oryndary oqytýshylary arasynda bilimdi taratý kezeńi bastalady. Eski mazmunmen jańa máselelerdi sheshý múmkin emes. Bul bizdiń ujymdyq sheshimdi qajet etetin úlken úderis, – dedi Ǵylym jáne joǵary bilim mınıstri Saıasat Nurbek.

Bul joba bıyl qańtar-maýsym aılary aralyǵynda onlaın jáne oflaın formatta ótedi. Oqý barysynda 1 800 oqytýshy qazirgi zamanǵy muǵalimderdiń bilim berý úrdisteri, stýdentke baǵdarlanǵan oqytý má­se­­leleri jáne sıfrlyq pedagogıka boıyn­­sha quzyrettiligin arttyrady. Sony­men qatar sarapshylar joǵary oqý oryn­darynyń 200 oqytýshysy men 50 aýyl mektebiniń dırektorlary úshin bilim berýdegi kóshbasshylyq baǵytynda biliktilikti arttyrý baǵdarlamasy boıyn­sha trenıngter ótkizedi ári CLIL tehnologııasy – pándik-tildi kiriktirilgen oqytý – joǵary oqý oryndarynyń 100 oqytýshysyna jekelegen dáris bolady.

Jobanyń ashylýynda Nazarbaev ýnıversıteti prezıdentiniń mindetin atqarýshy Ilesanmı Adesıda oqytý­shylardy oqý kýrsynyń bastalýymen quttyqtap, oqý ordasynyń otandyq bilim berýdi ózgertýge qosqan úlesin atap ótti.

Aıta keteıik, trenıngterdi fın­dik jáne Nazarbaev ýnı­versıtettiń sarapshylary, sonyń ishinde NU GSE qaýymdastyrylǵan professorlary Dúıshónkúl Shamatov pen Sulýshash Kerimqulova, Nazarbaev ýnıversıtetiniń akademııalyq sapa jónindegi dırektory Álııa Súleımenova, ınstıtýttyq tıimdilik jónindegi qaýymdastyrylǵan dırektor Aıjan Mýsına júrgizedi. Jobaǵa jergilikti sarapshylar men otandyq joǵary oqý oryndarynan 50 pedagogıkalyq ázirleýshi de tartylǵan.

– Innovasııalyq bilim berý jobasy aıasynda Dúnıejúzilik bank arqyly 30 bilim berý baǵdarlamasy beıimdelgen. О́kinishke qaraı, keıingi jyldary pedagogıkalyq joǵary oqý oryndarynda úlken ózgerister men reformalar bolǵan joq. Búgingi iske asyrylyp jatqan baǵdarlama – alǵashqy bastamalardyń biri. Nazarbaev ýnıversıteti Joǵary bilim berý mektebi osy baǵdarlamanyń nátıjesinde, pedagogıkalyq ýnıversıtetterdegi bilim jaqsara túsedi degen úmitte, – dedi Dúıshónkúl Shamatov.

Jobanyń ashylý sessııasynan keıin oflaın rejimde josparlanǵan trenıng bastalyp ta ketti. Ártúrli ýnıversıtetterden kelgen oqytýshylar toptarǵa bólinip, arnaıy tapsyrmalarmen jumys istedi. Astana halyqaralyq ýnıversıteti pedagogıkalyq ınstıtýtynyń qaýym­das­tyrylǵan professory, Matema­tıka jáne matematıkalyq modeldeý ınstıtýtynyń PhD Dáýlet Nurah­metovtiń aıtýynsha, bul bastama oqytýshylar úshin dál qazirgi sátte asa qajet.

– Qazir kúndelikti ómirde, tehnologııada, áleýmettik salada bolyp jatqan jańalyqtar oqý úrdisinde mindetti túrde eskerilýi kerek. Soǵan baılanys­ty buǵan oqytýshy qalaı, qaı jaǵynan daıyn bolýy kerek degen dúnıeni jaqsy bilý mańyzdy. Sebebi biz shákirt tárbıeleımiz. Bolashaqta olar mektepterde, ýnıversıtetterde nemese mekemelerde jumys isteıdi. Sondaı-aq bolashaq muǵalimderdiń boıynda qandaı quzyrettilik bolýy kerek degen suraq týyndap jatyr. Olar qalaı básekege qabiletti bola alady? Álemde bolyp jatqan ózgeristerge ilesip, damyp jatyr ma? Mine, jobada osy taqyryp tóńireginde pikir talastyryp, aqparat almasyp, shyńdalyp jatyrmyz. О́tken aptada trenıng onlaın rejimde boldy. Al qazir oflaın rejimde ótip jatyr. Oǵan ártúrli sala boıynsha birneshe ýnıversıtet qatysyp otyr. Bárimizdiń maqsatymyz bir – týyndaǵan máselelerdi jik-jigimen taldap, talqylaý. Iаǵnı bizdiń oqytyp jatqan júıemiz álemdik standarttarǵa saı kele me, kóshten qalyp qoıǵan joqpyz ba, aınalamyzda ne bolyp jatyr degen nársege nazar aýdarý. Ásirese bir-birimizben pikir almasa otyryp, halyqaralyq sarapshylardyń usynysyn eskere otyryp, deńgeıimizdi anyqtaý qajet, – dedi D.Nurahmetov.

Bul jobada Fınlıandııanyń úzdik, jetekshi ýnıversıtetteriniń tájirı­beleri paıdalanylyp otyr. «Muǵalim áleýetin nyǵaıtý úderisi turaqty bolýy úshin bizge, eń aldymen, júıeli kózqaras qajet. Qazaq muǵalimderimen seriktese otyryp, baǵdarlamanyń mazmunyn daıyndadyq. Kýrs aıasyndaǵy bizdiń mindetimiz – pedagogıkalyq joǵary oqý oryndary úshin jańa beıimdelgen sıllabýs qurý. Biz álemdegi eń úzdik bilim berý júıesiniń ókilderi retinde óz tájirıbemizben bólisip otyrmyz», dedi HAMK ýnıversıtetiniń treneri Irmelı Lıngnel.

Aıta keteıik, 15-19 qańtar aralyǵynda Nazarbaev ýnıversıtette, Abaı atyn­daǵy Qazaq ulttyq pedagogıkalyq ýnı­versıtetinde jáne О́.Jánibekov atyn­daǵy Ońtústik Qazaqstan pedagogı­kalyq ýnıversıtetinde parallel oflaın sessııalar ótti. 22-26 qańtar aralyǵynda sessııalar Á.Marǵulan atyndaǵy Pavlodar pedagogıkalyq ýnıversıtetinde, Qoja Ahmet Iаsaýı atyndaǵy Halyqaralyq qazaq-túrik ýnıversıteti jáne H.Dosmuhamedov atyndaǵy Atyraý ýnıversıtetinde ótip jatyr. Oǵan 950-den astam oqytýshy qatysady.