Assyltas TV arnasyna bergen suhbatynda maman Almaty seısmologııalyq qaýip boıynsha álemdik tizimde kósh bastap turǵanyn jetkizdi.
- Jer silkinisi kezinde úıde boldym. Aldymen gúrildegen dybystar shyqty, kóshedegi kólikter eken dep oıladym. Baıqasam, úı shaıqalyp tur. Men ondaı jaǵdaılarǵa daıyn adammyn, qorqynysh bolǵan joq. Al kóp adamnyń esi shyǵyp ketti, barlyǵy dala shyqty. Bizdi jaratylys saqtady. Budan qatty bolsa, qyrǵyn bolar edi. Qazir jer sharynda eń qatty jer silkinisi bolatyn jerler – Japonııa, Indonezııa, Chılı, Qazaqstanda osy Almaty. Bul baıaǵyda zerttelgen, seısmologtardyń barlyǵy biledi, – deıdi Eleýsizov.
Ekolog Almatydaǵy jańa salynyp jatqan úılerdiń qurylys sapasyn synǵa aldy. Onyń aıtýynsha, qurylys barysynda sapasyz materıaldar qoldanylady, sondaı-aq jańa qurylystardyń barlyǵy tyǵyz salynady. Jer silkinisi sekildi apatty jaǵdaılarda turǵyndardyń jınalatyn qaýipsiz bos alańdary joq.
- Keńes odaǵy kezinde Qonaevtyń suraýymen bolýy kerek, Almatyǵa arnaıy ǵalymdar kelip zertteý jasaǵan. Sonda ǵalymdar Almatynyń ekologııalyq syıymdylyǵynyń 700 myń adamǵa laıyqtalǵanyn aıtyp ketken. Al qazir shamamen 3 mln adam bar. Bul sannyń áli de ósetin múmkindigi bar. Taǵy 4 qala salamyz deıdi. Esi aýysqan bulardyń. Qazir sý tapshy. 44 paıyz muzdyqtarymyz erip ketti, – dep dabyl qaqty ekolog.
Sondaı-aq Mels Eleýsizov halyqty jer silkinisi kezinde úreıge boı aldyrmaýǵa shaqyrdy.
- Halyqqa úıretý kerek. «Panıka» degen jaman dúnıe. Jer silkingende alǵashqy tolqyn ótken soń, aqyryn syrtqa shyǵý kerek. Japonııada kishkentaı balalarǵa deıin biledi alǵash ne isteý keregin. Ústeldiń astyna nemese ózderine belgilengen jerlerge tyǵylady. Sol sekildi bizde de bárine daıyn bolý kerek, – deıdi ekolog.
Sonymen qatar suhbat barysynda ekolog Qazaqstandaǵy ekologııalyq problemalarǵa, ásirese Balqashtyń tartylyp ketý qaýpine toqtalyp, bıliktiń jedel nazar aýdarýy kerek ekenin aıtty.
