Sýretterdi túsirgen – Erlan OMAR, «EQ»
Álemdik ındekste ulttyń sapasy halyqtyń damý múmkindigimen, ekonomıkalyq qaýqarymen, saıası turaqtylyǵymen baǵalanady. Elimizdiń alǵa qoıǵan basty mindeti de – sapaly ultqa aınalý. Osy taqyrypty qozǵaǵan ǵalymdar sapaly ult bolýdyń alǵy sharttary haqynda, bilim men ǵylymnyń qoǵam damýyndaǵy róli, qazirgi jaǵdaıy, ulttyq mádenıettiń biregeıligi tóńireginde oı-pikirlerin ortaǵa salyp, stýdentterge óz tájirıbelerin aıta otyryp taǵylymdy kezdesý ótkizdi.
Eýrazııa ulttyq ýnıversıtetiniń akademııalyq máseleler jónindegi prorektory Serik Maqysh ǵalymdarǵa alǵys bildire otyryp, ozyq ǵylym, tehnologııa, mádenıet, dástúr, qundylyq osynyń bári ult sapasyn qalyptastyratynyn jetkizdi. «Is-sharamyzǵa alty alashqa aty áıgili, sapaly ult qalyptastyrý jolynda eńbek etip júrgen, ultymyzdyń sapaly ókilderi dep aıta alatyn azamattar kelip otyr. Olardyń ýnıversıtetimizdiń stýdentterimen kezdesý ótkizýi – mańyzdy da mártebeli jıyn. Bul jastarǵa úlken ónege, tárbıe», dedi ol.
Akademık Ýálıhan Qalıjan stýdentterge «ultty qaı salada da ilgeriletetin – adam boıyndaǵy mahabbat» degen oıdy jetkizgen erekshe de áserli essesin oqyp berdi. Jazýshy-ǵalym Tursyn Jurtbaı «Abaı joly» romanyndaǵy kórkem shyndyq máselelerin qozǵaı otyra tanym, dástúr tóńireginde sapaly ulttyń bolmysyn aıshyqtap kórsetti.
Akademık Kárimbek Qurmanálıev is-sharanyń Ǵylymı kitaphanada ótkizilip otyrǵanynyń da erekshe máni bar ekenin aıtty. «Sheteldik áleýmettanýshy ǵalymdardyń málimdeýinshe, keleshekte kompıýterde otyrǵandardy kitap oqyǵandar basqarady. Sondyqtan múıizi qaraǵaıdaı akademık aǵalaryńyzdyń aldaryńyzǵa kelip otyrǵany bir jaǵynan, kitapqa degen súıispenshilikti, kitaphanaǵa degen kózqarasty qalyptastyrýǵa baǵyttalǵan. Izdenis – úlken ǵylymǵa qadam. Eýrazııa ulttyq ýnıversıtetiniń sapaly ultty qalyptastyrýǵa qatysty akademık ǵalymdardyń oıyn bileıik dep shaqyryp otyrǵany – kóregendi. Prezıdentimiz Qasym-Jomart Toqaev ulttyq qundylyqty ulyqtaý, sapaly ult, tarıhı tulǵalardy dáripteý máselesin Ulttyq quryltaıda kún tártibine engizgen bolatyn. Keıingi «Egemen Qazaqstan» gazetine bergen suhbatynda da osyǵan basa mán berý keregin aıtty. Sizder de sol suhbatty oqyp shyǵyp oı túıip, pikir almasyńyzdar. Bizdiń bilim men ǵylymǵa mán berýimiz kerek ekenin túsinińizder. Jalpy, bilim men ǵylymdy ekinshi orynǵa qoıǵan memleket eshqashan eshbir salada birinshi bola almaıdy degen tujyrym bar. Ekonomıka bolsyn, aýyl sharýashylyǵy bolsyn barlyǵy ǵylymǵa negizdelýi kerek», dedi ǵalym stýdentterge baǵyt bere otyryp.
Al Dıhan Qamzabekuly joǵary oqý ornynda bilimmen býyny bekip, ǵylymǵa endi bet alyp bara jatqan jastarǵa el bolashaǵyn qalyptastyrýdaǵy mańyzdy mindetter men baǵyttar týrasynda sóz qozǵady. Sapaly ulttyń negizi sanasynda sáýlesi bar jastar ekenin aıtyp, taqyryp tóńireginde keleli oıyn jetkizdi.«О́zderińiz biletindeı, Prezıdenttiń suhbaty jarııalandy. Árıne, bul – saıası-tanymdyq suhbat. Álemde keıbir názik máseleler bar. Memleket basshysy bizge, qoǵamǵa sony túsindirdi. Eger ony Prezıdent aıtpasa, bilikti, bilimdi azamattar baıyptamasa, kim aıtady? Qazirgi zamanda sapany qalyptastyratyn – ǵylym men tehnologııa. Qazir jastarǵa jan-jaqty múmkindik bar. Álemdik deńgeıdegi ǵalymdardyń dáristeri ashyq júıede tur. Osynyń barlyǵy artyqshylyq. Kemshiligi de joq emes. Kóp aqparat adastyryp ta jiberedi. Biraq sizder osynyń arasynan adaspaı jol tabýlaryńyz kerek. Búgingi bilimniń astaryn bilý kerek. Biraq qansha bilimdi bolsańyzdar da báribir rýhanı dástúr máselesi aldyńyzdan shyǵady. Bilim dástúrmen baılanysta bolady. Sapaly ult – tabysty ult. Tabysty ult bolý úshin bilimdi ult bolý kerek», dedi D.Qamzabekuly.
Ǵalym Amantaı Shárip jas býynnyń jarqyn bolashaqqa bastaıtynyna senim bildirip, jıyndy qorytyndylady. «Ár urpaq óziniń qolynan kelgenin jasap, keıingige tabystap ketedi. Biz de óz tájirıbemizdi aıtyp, oıymyzdy ortaǵa salyp jatyrmyz. Aqyn Esenǵalı Raýshanovtyń «Altynnyń ústinde turyp, basqanyń kúmisine tańǵaldyq» degen sózi bar. Bizdiń jerimizdiń asty da, ústi de altyn. Sondyqtan altynymyzdy baǵalaýymyz kerek. Biz bolashaqqa, jastarǵa senemiz. Árqaısysyńyz myqty bolsańyzdar, sapaly ult sonda qalyptasady», dedi ǵalym.
Is-sharanyń qorytyndy bóliminde ǵalymdarǵa TURKSOY halyqaralyq uıymynyń ataýly medaldary tapsyryldy.
