Foto: ngs.ru
Jelige júginsek, jol-kólik erejesin buzý faktisin foto-vıdeo fıksasııa jasap quzyrly organdarǵa jóneltetinder qatary artqan. Mundaı áreketter keı júrgizýshiler tarapynan narazylyqqa tap bolyp jatyr.
Elimizde úshinshi tulǵa tártipti buzý deregin alyp, kólikti syrtynan túsirip polısııaǵa shaǵymdanýǵa qanshalyqty quqyly? Osy mazmundaǵy habarlama jasaǵan adamǵa belgili mólsherde syıaqy berile me? Qoǵamda qyzý talqylanyp, turǵyndar tarapynan joldanǵan saýaldy Astana qalalyq polısııa departamenti mamandaryna qoıyp kórdik.
«Qazaqstan Respýblıkasynyń jol júrýge qatysy bar ár azamaty jol erejesin saqtaý kerek. Sondyqtan úshinshi tulǵanyń beınekameraǵa nemese foto fıksasııa jasap bizge jibergeni durys dep esepteımin. Zańbuzýshylyqty polısııaǵa joldaý 102 nomerimen qosa onlaın kanal arqyly júzege asyrylady. Shaǵymǵa dálel retinde foto-vıdeo fıksasııa jasap polısııaǵa jiberý kerek. Osy tıptegi aryz-shaǵymdardy Polısııa departmentiniń saıt bólimshesi qarap, tirkeıdi. Aryz negizinde bizdiń áriptester áreketke kóshedi. Eger polısııa kelgen kezde kólik quraly ornynda bolmasa júrgizýshiniń adresine tártip buzýshylyq dereginiń salmaǵyna saı aıyppul salynady. Al úshinshi tulǵalardyń bul iske belsendi aralasýy polısııanyń isin jeńildetip qana qoımaı, qoǵam bolyp jol erejesin buzbaýǵa yntalandyrady. Naqty foto-vıdeo dálel bolsa biz mindetti túrde shara qoldanamyz», dedi Astana qalalyq Patrýldik polısııa polkiniń qyzmet ınspektory Nurlan Ábjanov.
Qazaqstan tájirıbesinde jemqorlyq jaıyn habarlaǵan tulǵalarǵa syıaqy berý júıesi qalyptasqan. Osy turǵyda jol-kólik erejesin, jol júrý tártibin buzý jóninde derekti onlaın kanal arqyly málimdegenderge de syıaqy usynyla ma degen zańdy saýal týyndaıdy.
«Kóz aldynda bolyp jatqan talapqa saı emes áreketti, jol erejesin buzý jaǵdaıyn kórse, jaıaý jolaýshylarǵa kedergi keltiretindeı kólik tártippen qoıylmasa tıisti orynǵa habarlaý ár azamattyń mindeti dep oılaımyn. Mundaı aqparat bergen úshinshi tulǵalarǵa eshqandaı marapat, syıaqy berý zańnamada kózdelmegen», dedi Nurlan Ábjanov.
