Foto: pexels.com
Sonymen qatar «Qazaqstan Respýblıkasynyń Ákimshilik quqyq buzýshylyq týraly kodeksine áıelderdiń quqyqtaryn jáne balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» ilespe zań jobasy da nazarǵa alyndy.
Májilis depýtaty Ashat Aımaǵambetov atap ótkendeı, zań jobalary Májilis depýtattarynyń bastamasymen ázirlengen. Zań jobalary Memleket basshysynyń turmystyq zorlyq-zombylyq úshin jaýapkershilikti kúsheıtý jónindegi tapsyrmasyna tolyǵymen sáıkes keledi.
«Zań jobasynda mynadaı negizgi normalardy usynyp otyrmyz: birinshiden, uryp-soǵýdy jáne densaýlyqqa jeńil zııan keltirýdi qoldanystaǵy ákimshilik jaýapkershilikten qylmystyq jaýapkershilikke aýystyrý jáne jazany qataıtý usynylady. Ekinshiden, jábirlenýshiniń ótinishin kútpeı-aq, buqaralyq aqparat quraldary men ınternet-platformalardaǵy zorlyq-zombylyq týraly aqparat negizinde sotqa aryz berýge múmkindik berý usynylyp otyr», dedi palatanyń jalpy otyrysynda Ashat Aımaǵambetov qujattardy tanystyra otyryp.
Sondaı-aq otbasynda zorlyq-zombylyq jasaǵan adamdardyń agressıvti minez-qulqyn ózgertý úshin sotqa psıhologııalyq kómek kórsetýdi mindetteý ýákilettiligin berý usynyldy.
«Pedofılderdi ómir boıy bas bostandyǵynan aıyrý týraly arnaıy norma bar. Sýısıdti nasıhattaý nemese sýısıdke ıtermeleý úshin qylmystyq jaýapkershilik engizý eskerilgen. Buǵan qosa, balalarǵa arnalǵan ınternattyq uıymdardy aldyn-ala eskertpeı-aq, kez kelgen ýaqytta olardy tekserý jáne taǵy basqa mańyzdy normalar usynyldy. Atalǵan zań jobasy boıynsha Májilistiń Áleýmettik-mádenı damý komıteti qorytyndy ázirleýge daıyn», dedi Ashat Aımaǵambetov.
