Foto: gov.kz
Adal Adam ıýtýb arnasyna suhbat bergen Jaqsylyq Dosqalıev máıit donorlyǵyn jandandyrmaı transplantasııa zárýligi azaımaıtynyn aıtty.
«Salamatty Qazaqstan» baǵdarlamasy boıynsha medısınalyq qural-jabdyqtar alyndy, transplantasııa jasaý úderisi damyǵan elderde mamandarymyz biliktiligin arttyryp, tájirıbe jınap qaıtty. Elimizde segiz jerde transplantasııa jasaıtyn deńgeıge jettik. Onyń ishinde asa aýyr ota túri sanalatyn júrek almastyrýdy tek Astana qalasynda atqaryp kelsek, Almaty men Shymkent qalasynda da júrek almastyrý otasy ótti», degen eks-mınıstr endigi másele donor tapshylyǵy ekenin aıtty.
«2019 jylǵa deıin adam tiri kezinde kelisim berse de, qarsy bolsa da qaıtys bolǵan soń máıittiń aǵza músheleri donorlyqqa alynatyn, odan keıin zańǵa jańa kodeks engizilip, marqum bolǵan adamnyń aldyn-ala kelisimi ne bolmasa týystarynan ruqsat suralady. Eger olar kelisim bermese máıittiń organdaryn ala almaısyń», degen transplantolog jylyna 2-3 máıitten ǵana aǵza alynatyndyqtan transplantasııa kezegi kúrt artqanyn aıtty. Zańǵa jańa kodeks engizilgenge deıin jyl saıyn 20-23 máıittiń aǵzasyn donorlyqqa jarap kelgen.
J.Dosqalıev halyqaralyq tájirıbege saı damyǵan elderdiń basym kópshiligi máıit donorlyǵyn paıdalanatyndyqtan, bizge de osy joldy tańdaǵan durys deıdi. Marqumnyń aǵzasyn alyp, kezekte turǵan naýqasqa almastyrý arqyly kóptegen adamǵa ekinshi ǵumyr syılaý saýapty is ekenin alǵa tartty.
«Donorǵa zárý, kezekte turǵan 4 myń adamnyń árqaısynyń artynda otbasy múshesi degen 5 adam bar. Olardyń da ýaıymy basym. Transplantasııa kezegin kútýshilerdiń arasynda bir úıdiń jalǵyz qyzy ne uly, otbasynyń asyraýshysy da júr. Ýaıymnan egilgen qam kóńil janǵa máıit donorlyǵy arqyly ekinshi ǵumyr syılaý izgi amal emes pe? Máıitke aǵza qajet emes, birneshe jyldan keıin jer astynda tek súıegi qalady, aǵzasy túgel erip ketedi. Sondyqtan zańdy qaıta ózgertip, burynǵydaı kózi tirisinde kelisim berse de, qarsy bolsa da máıittiń aǵzasyn alýdy iske qosqan durys. Bir máıittiń aǵzalary bes adamnyń ómirin saqtap qala alady», dedi J.Dosqalıev.
