Foto: parlam.kz
Depýtattyń aıtýynsha Qaraǵandyda aıdyń-kúnniń amanynda óz qyzmetin adal atqaryp júrgen jedel járdem júrgizýshisin qanjosa etip soqqyǵa jyǵý – baryp turǵan bassyzdyq.
«Quqyqbuzýshy Nurbolat Dákebaevtyń áreketi – jáı ǵana qylmys emes, búkil qoǵamǵa, zań men tártipke ashyq qarsylyq, ne isteı alasyń degen dóńaıbat. О́zin beınetaspaǵa túsirip jatqanyn bilip tursa da, eshqandaı aıylyn jımaı judyryq siltep, qyzmettegi adamdy qanǵa bóktirýi – ábden shekten shyqqandyq, naǵyz qanypezerlik», dedi depýtat.
Onyń aıtýynsha, ondaı oqıǵalar elimizde jeterlik. Osy kúnge deıin depýtattyq korpýs birneshe ret medısına júıesiniń qyzmetkerlerin qorǵaý úshin arnaıy statýs bekitýdi usynsa da, Úkimet áli kúnge deıin sheshim qabyldamaı keledi.
Depýtat Almatyda avtobýs júrgizýshisimen bolǵan qaıǵyly oqıǵany da mysalǵa keltirdi.
Májilismen ondaı oqıǵalarǵa sebep bolyp otyrǵan birneshe faktorǵa toqtaldy.
Elnur Beısenbaevtyń sózinshe atalǵan jaǵdaılar eń aldymen, tıisti organdardyń óz jumysyna salǵyrt qarap, quqyq buzýshylyqtardyń aldyn alý sharalaryn durys uıymdastyrmaǵanyn kórsetedi. Ekinshiden, kópshilik qarapaıym ǵana quqyqtyq qaǵıdalardy bilmeıtinin baıqatady. Olar óz quqyǵyn bylaı qoıǵanda, zań aldyndaǵy mindetteri men jaýapkershiliginen de beıhabar. Zań men tártip bárine birdeı qaǵıdatyn ustaný – árbirimizdiń mindetimiz. Úshinshiden, ulttyq qundylyqtardan ada, ádep pen ar-uıatty artta qalýshylyq dep sanaıtyn, adamshylyqqa jat oılarmen sanasy ýlanǵan azamattar qalyptasyp keledi.
«Eshqandaı jaqsylyqqa aparmaıdy. Saldaryn kórip otyrmyz. Zań men tártip ústemdik etetin, árbir azamattyń quqyǵy qorǵalǵan, óz ómiri men densaýlyǵyna qaýiptenbeıtin ádiletti Qazaqstandy qalaımyz jáne ony quramyz. Prezıdentimiz aıtqandaı: «Bizde zań men tártip buzýshylyqqa tózbeıtin jaǵdaı qalyptasýy kerek», dep atap ótti ol.
Depýtat ýákiletti organdarǵa mynadaı sharalardy qolǵa alýdy usyndy:
«Quqyq qorǵaý organdary qylmys jasaǵan Dákebaevty tez arada tabýy tıis. Oǵan qatysty sotty ashyq júrgizip, qatań jaza taǵaıyndaý jáne onyń barysy men qorytyndysy týraly buqaralyq aqparat quraldary arqyly halyqty túgel habardar etý kerek. Sońǵy ýaqyttary adamnyń jeke basyna qaýip tóndiretin, tipti onyń ómirin qııatyn qylmystar qoǵamdyq sıpat alyp otyr. Sol sebepti, tez arada kez kelgen qylmystarǵa qoǵamda múldem tózbeýshilik mádenıetin jappaı qalyptastyrýymyz qajet», dedi Májilis depýtaty Elnur Beısenbaev.
