Foto: senate.parlam.kz
Máýlen Áshimbaev oqýshylardyń oqyrmandyq saýaty tómendep bara jatqanyn aıtty. Sońǵy jyldary EYDU PISA-nyń halyqaralyq bilim berý sapasyn baǵalaý reıtıngi EYDU elderindegi qatarlastarynan úlgerim jaǵynan aıtarlyqtaı artta qalǵanyn kórsetip otyr. Senat Tóraǵasy bul másele ómir súrý, kásibı biliktilikti qalyptastyrý baǵytyndaǵy negizgi qarym-qabiletti joıyp jiberý qaýpin tóndiretinine alańdaıtynyn jetkizdi.
«2023 jyldyń jeltoqsanynda biz EYDU PISA-2022 bilim sapasyn halyqaralyq baǵalaýdyń jańa nátıjesin aldyq. Bizdiń mektep oqýshylarynyń nátıjeleri boıynsha ósý dınamıkasynyń bolmaýy kóńilge kirbiń uıalatady. Keıbir kórsetkishter boıynsha jaǵdaıdyń nasharlap bara jatqanyn baıqaýǵa bolady. Atap aıtqanda, oqyrmandyq saýattyń tómendeýi erekshe alańdatyp otyr. Bizdiń oqýshylar ózge elderdegi qatarlastarynan 3 jylǵa qalyp barady. Jalpy, oqý saýatynyń tómendeýi júıeli máselelerdi kórsetedi. Ol búginde balalardyń áleýmettik jelilerge tym áýes ekenin bildiredi», dedi Senat Spıkeri.
Máýlen Áshimbaev oqý saýatyn arttyrý jóninde arnaıy baǵdarlama qabyldaý qajettigin atap ótti. Zertteý nátıjesi tek statıstıka emes, sheshim qabyldaý quraly jáne máseleni sheshý úshin odan ári tıimdi áreket etý jónindegi nusqaýlyq ekenin de tilge tıek etti.
«Birinshiden, Oqý-aǵartý mınıstrligi aıasynda oqý saýattylyǵyn arttyrý jóninde arnaıy baǵdarlama qajet. Ekinshiden, nátıje belgili bolǵannan keıin (shamamen - PISA nátıjesi boıynsha) ony jyly jaýyp qoıýǵa bolmaıdy. Odan qorytyndy shyǵarý kerek. Soǵan sáıkes is-qımyl josparyn jasap, qalyptasqan jaǵdaıdy ózgertý qajet. Sondyqtan Senattyń tıisti komıtetimen birlese otyryp, aldaǵy sharalar talqylanyp, iske asyrylady dep kútemiz. Jalpy, mundaı halyqaralyq zertteýlerdiń nátıjelerine óte baıypty qaraý kerek. Kóshbasshy elderdiń tájirıbesi boıynsha oqyrmandyq saýattylyqty damytý jónindegi Ulttyq baǵdarlama ázirlese de artyq etpeıdi», dedi Senat Tóraǵasy.
