Reseıdiń Orynbor oblysynda týyp-ósken 33 jastaǵy Damır Ismaǵulovtyń osy sport túrin serik etkenine 10 jylǵa taıady. Sol aralyqta 27 jekpe-jek ótkizgen qandasymyz 24 ret jeńiske jetip, 13 básekeni merziminen buryn aıaqtady. 2017 jyly ol óziniń týǵan ólkesinde Maksım Dıvnıchti nokaýtqa jiberip, M-1 Global nusqasy boıynsha jeńil salmaqtyń chempıondyq belbeýin ıelendi. Sodan keıin Damır óz ataǵyn eki ret sátti qorǵady.
Ol 2018 jyly UFC-men kelisimshartqa otyrdy. Álemniń eń beldi promoýsheninde D.Ismaǵulov jeti jekpe-jek ótkizdi. Alǵashqy kezderi ol jankúıerlerin tek jarqyn jeńisterimen qýantty. Damır aýstralııalyq Aleks Gordjıs, ıspanııalyq Hoel Alvares, brazılııalyq Tıagý Moızes pen Rafael Alvıs, shvesııalyq Gýram Kýtateladzeni qapy qaldyryp, óz salmaq dárejesinde TOP-15 sportshynyń qataryna erkin qosyldy. Biraq keıingi eki kezdesýinde qandasymyz jeńilistiń kermek dámin tatty. Atap aıtsaq, 2022 jyldyń jeltoqsanynda reseılik Arman Sarýkıan men byltyr jazda amerıkalyq Grand Doýsonǵa upaı sanymen ese jiberdi. Sodan keıin Ismaǵulov UFC-den ketti.
Edýard Vartanıan – 1991 jyldyń týmasy. Ol Armenııada dúnıege kelgenimen, bala kezinde ata-anasymen birge Reseıge qonys aýdardy. 2011 jyly aralas jekpe-jekten ótken jarystarǵa shyǵa bastady. Sol kezden beri 29 kezdesý ótkizip, 25 márte jeńis toıyn toılady. 14 qarsylasyn esinen tandyrdy. Osy tabysy arqyly ASA chempıony atandy. Edýard tek Abdýl-Azız Abdýlvahabovtan eki ret, Alım Kokov pen Alı Bagovtan jeńildi. 2018 jyldan beri armıan faıteri segiz ret oktagonǵa shyǵyp, barlyǵynda basymdyq tanytty.
Kópshilik Vartanıannyń qanshalyqty qarýly jigit ekenine byltyr 16 maýsymda Sochıde uıymdastyrylǵan ASA Gran-prı týrnıriniń fınalynda anyq kóz jetkizdi. Jeńil salmaqtyń bas júldesi úshin ol Qazaqstannyń tanymal sportshysy Artem Reznıkovpen kúsh synasty. Báseke bastalǵan bette tizgindi qolyna alǵan Edýard jerlesimizdi ońdyrmaı sabady. Úshinshi raýndtyń bel ortasynda tóreshi jekpe-jekti toqtatýǵa májbúr boldy.
Árıne, Damır Artem emes ekeni anyq. Qazaq faıteriniń UFC-de jıǵan mol tájirıbesi bar. Onyń ústine D.Ismaǵulov birde-bir ret aıqyn utylǵan joq. Qandasymyz oktagonda armıan jigitiniń erkin oıqastaýyna múmkindik bere qoımas. Sondyqtan da bizdi alda óte qyzyqty ári tartysty jekpe-jek kútip tur dep oılaımyz.
