Foto: Ashyq derekkóz
Elorda tórinde ótken chempıonatta elimizdiń 20 óńirinen kelgen 600-den astam sportshy baq synady. Chempıonattyń birinshi kúni 55, 63, 72, 82 kelige deıingi jáne olımpıadalyq salmaqqa jatatyn – 97 kelige deıingi salmaq dárejelerinde medaldar sarapqa salyndy.
55 kelige deıingi salmaq dárejesinde óner kórsetken Almaty qalasyndaǵy 5571 áskerı bóliminiń áskerı qyzmetshisi qatardaǵy Aıbek Aıtbekov pen 97 kelige deıingi salmaqta baq synaǵan Qostanaı qalasyndaǵy 6697 áskerı bóliminiń áskerı qyzmetshisi qatardaǵy Isýf Masıev kúmis medal jeńip aldy. 72 kelige deıingi salmaq dárejesinde kúresken 5571 áskerı bóliminiń qatardaǵy jaýyngeri Eldos Kemelovke qola medal buıyrdy.
Al jarystyń ekinshi kúni Ulttyq ulan qurama komandasynyń qorjyny grek-rım kúresinen túsken eki kúmis medalmen tolyqty. Bul joly 77 keli salmaqta Ulttyq ulan sport quramalaryn daıarlaý ortalyǵynyń dene shynyqtyrý jáne sport nusqaýshysy efreıtor Tamerlan Shadýkaev pen 63 kelige deıingi salmaq dárejesinde óner kórsetken О́skemen qalasynyń 5518 áskerı bóliminiń áskerı qyzmetshisi qatardaǵy jaýynger Dıas Áskerbaı kúmis júlde ıegerleri atandy.
«Ulttyq ulannyń 27 áskerı qyzmetshisi grek-rım jáne erkin kúresten synǵa túsip jatyr. Eki kún ishinde bizdiń jigitter 5 medal jeńip aldy. Olardyń árqaısysy bozkilemde sheberlikterin, joǵary daıyndyq deńgeıin jáne jeńiske degen umtylysyn baıqatty», dedi Ulttyq ulan Bas qolbasshylyǵynyń dene shynyqtyrý jáne sport bóliminiń bastyǵy polkovnık Satjan Ábishev.
Bıylǵy Qazaqstan chempıonatynda ıaǵnı grek-rım jáne erkin kúreste jeńiske jetken balýandar Parıj-2024 Olımpıada oıyndaryna jol ashatyn lısenzııalyq týrnırlerge qatysýǵa múmkindik alady.
