Asa jeńil salmaqta Eldos Smetov kúresti. Keıingi kezderi baǵy janbaı júrgen dańqty balýan osy joly jaqsy óner kórsetip, álemdik reıtıngtegi jaǵdaıyn túzeıdi dep úmittendik. Alaıda ol ekinshi aınalymnan asa almady. Tusaýkeser kezdesýde mysyrlyq Ádel Hamadany utqan Eldos ile-shala Ońtústik Koreıanyń oǵlany, álem men qurlyq chempıonaty jáne Azııa oıyndarynyń jeńimpazy Lı Harımge ese jiberdi. Dál osy salmaqtaǵy Nurqanat Serikbaev birinshi kezeńde ózbekstandyq Doston Rýzıevtiń osal tusyn taba almady.
66 kg salmaqtaǵy Ǵusman Qyrǵyzbaev kongolyq Krıst Mýpatany qapy qaldyrǵanymen, kóp uzamaı álemniń eki dúrkin chempıony, eki dúrkin kúmis júldegeri, Azııa oıyndarynyń fınalısi japonııalyq Dzıosıro Marýıamanyń ońaı oljasyna aınaldy. Eset Qýanov úshinshi aınalymǵa deıin jetti. Ol venesýelalyq Ýıllıs Garsııa men moldovalyq Radý Izvoreanýdy jeńip, Panamerıka oıyndarynyń eki dúrkin júldegeri, óz qurlyǵynyń eki dúrkin chempıony, brazılııalyq Vılıan Lımaǵa jarytyp qarsylyq kórsete almady.
Kelesi kúni erler taǵy eki salmaq dárejesiniń júldelerin sarapqa saldy. 73 kg salmaqtaǵy Asqar Narqulov alǵashqy aınalymda kıprlyq Andreý Kıprıanosty qapy qaldyrǵanymen, ile-shala ózbekstandyq Shahram Akhadovtan aılasyn asyra almady. Esesine, Danııar Shamshaevtyń ekpini kúshti boldy. 2022 jyly Astanada Azııa chempıony atanǵan qazaq balýany bastapqy básekelerde Hose Antonıo Aranda Olalla, latvııalyq Abdýlfaz Nasırovs, fransııalyq Hýan-Benjamın Gabany utyp, shırek fınalda japonııalyq Tasýkı Ishıharaǵa jol berdi. Jubanysh beldesýde Danııar kosovalyq Dardan Senanyń aıaǵyn kókten keltirdi. Alaıda kelesi kezdesýde ol da Narqulovty jeńgen Akhadovqa ese jiberdi. Sóıtip, Shamshaev besinshi oryndy qanaǵat tutty.
81 kg salmaqtaǵy Rýslan Musaev tusaýkeser kezdesýinde ózbekstandyq Musa Sobırovtan utylsa, Abylaıhan Jubanazar argentınalyq Tomas Morales, aýstrııalyq Vahıd Borchashvılı jáne Portýgalııanyń ataqty dzıýdoshysy Anrı Egýtıdzeni jolynan yǵystyrǵanymen, Olımpıadanyń qola júldegeri, álem chempıony, Eýropa oıyndarynyń jeńimpazy, belgııalyq Mattıas Kasstan jeńildi. Jubanysh beldesýde de Abylaıhannyń asyǵy alshysynan túspedi. Ol moldovalyq Mıhaıl Latyshevtan utyldy.
Úshinshi jarys kúni 90 kg salmaqtaǵy Aıdar Arapov pen Ermahan Ánýarbekov alǵashqy aınalymdarda túrkııalyq Mıhael Jgank pen reseılik Egor Voropaevtan jeńildi. 100 kg salmaq dárejesinde beldesken Bekzat Shaǵataev brazılııalyq Rafael Býzakarınıden jyǵyldy. Amerıkalyq Natanıel Kıvti qapy qaldyrǵan Nurlyhan Sharhan odan keıin nıderlandtyq Mıhael Korrelmen kúsh synasty. Álemniń úsh dúrkin qola júldegeri, Eýropa chempıony qazaqtyń nar tulǵaly azamatynyń aldynda tize búkti. Shırek fınalda Sharhan Serbııanyń sańlaǵy, álem chempıonatynyń kúmis júldegeri, Eýropa chempıony Aleksandar Kýkolge jer sıpatyp ketti. Jartylaı fınalda ol Ispanııanyń týy astynda óner kórsetip júrgen grýzın jigiti Nıkoloz Sherazadashvılıdiń osal tusyn taba almady. Qola medal úshin bolǵan básekede jerlesimiz Eýropa birinshiliginiń qola júldegeri, shveısarııalyq Danıel Eıhten basym túsip, jankúıerlerdi qýantty.
Soqyr jerebe Ǵalymjan Qyryqbaıdy birden dańqy jer jarǵan Teddı Rınermen jolyqtyrdy. Olımpıadanyń úsh jáne álemniń 12 dúrkin chempıony qandasymyzdy esh qınalmaı utty. Esesine, Erasyl Qajybaev Fransııanyń ekinshi nómirli dzıýdoshysy Tergek Djozevti jolynyn yǵystyryp, kelesi kezeńde álem chempıony, Panamerıka oıyndary men birinshiliginiń úsh dúrkin jeńimpazy kýbalyq Endı Grandany ońdyrmady. Biraq odan árige Erasyldyń shamasy jetpedi. Shırek fınalda ol japonııalyq Kanto Nakanoǵa jáne jubanysh beldesýde grýzııalyq Iraklıı Demetrashvılıge jol berdi.
Osylaısha, Parıjge sapar shekken Qazaqstannyń dzıýdoshylary arasynan tek Nurlyhan Sharhannyń ǵana jeńis tuǵyryna kóterilýge kúsh-jigeri jetti. Al Danııar Shamshaev besinshi oryndy qanaǵat tutty. Mine, Fransııanyń astanasynda ótken Grand Slam týrnırindegi eń úzdik nátıjemiz – osy.
