Nemistiń óner teoretıgi Frıdrıh Shellıng «músin – tasta qatyp qalǵan áýen» deıdi. Kórmeni de zatqa qonǵan ún nemese oı desek bolady. Sýretshi Jan Lıýk Korne eski qalalyq telefondarǵa uly ónerdiń qasıetin qondyra bildi. Ol «Telefon qoılar» degen kórme uıymdastyryp, kórgen janǵa erekshe sezim syılady. Sýretshi ózgeshe «qoılardy» telefon kábilderinen jáne eski telefondardan jasap shyǵarǵan.
Kórme jansyz zatqa til bitire alýymen erekshelenedi. Qarapaıym dúnıeden kórermen kózaıymyna aınalǵan músin tehnologııanyń qanshalyqty jyldam damyp kele jatqanyn jáne eski zattardy qalaı tıimdi paıdalanýǵa bolatynyn kórsetedi.
Qazir symy bar stasıonarlyq telefondar qoldanystan shyqty. Olardyń barlyǵy derlik Qytaıǵa qaıta óńdeýge ketti, biraq keıbiri erekshe fransýz sýretshisi Jan Lıýk Korneniń qolyna tústi. Frankfýrttaǵy baılanys murajaıyndaǵy kórme ónertanýshylar tarapynan «birtúrli kórme» degen baǵa alǵan. 32 basy bar túrli-tústi qoılar kórmesi únemi jańaryp turady. Olardyń aıaqtary telefon tutqalarynan, bastary apparattardyń ózinen, al qalyń qoı terisi buralǵan symdardan jasalǵan. Avtor sıfrlyq dáýirde úderistiń qanshalyqty jyldam júretinin kórsetkisi kelgen.
Jahan jyldam jańarady, bir orynda turmaıdy. Sát saıyn jańa tehnologııalar paıda bolyp, eskilik esik tabaldyryǵynda qalyp jatyr. Biraq osy kórmedegi «qoılar» sekildi, dúnıe ózgerse de bir qalypta tura beretin óshpes, ólmes dúnıeler taǵy bar. Sýretshiniń aıtqysy kelgeni de – osy.
