Megapolısti damytýdyń basty ustanymy – jurtqa jaqyn, turǵyndar jaıaý bara alatyn jerlerge balabaqshalar, mektepter, medısınalyq mekemeler men aıaldamalar salý. Eń bastysy, Almatyda egjeı-tegjeıli josparlaýdyń jańa jobasynda az qabatty qurylysqa basymdyq berilgen.
Almaty qalasy ákiminiń orynbasary Asqar Ámrın jańa ETJ-nyń jaı-japsaryn baıandaı otyryp: «Búgingi tańda biz qurylys salýmen aınalysatyndarǵa ETJ-ny naqty basshylyqqa alý kerektigin uqtyryp otyrmyz. Qurylys salýshy alty qabatty turǵyn úıdi ETJ-daǵy sharttardy qaperde ustaı otyryp, eskızi maquldanǵannan keıin ǵana jobany júzege asyrady. Esterińizde bolsa, bes qabatty ǵımarattyń nóldik buryshynda toǵyz qabatty ǵımarattar salynsa, jańa ETJ-da munyń jolyn kestik jáne árkim «bilgenin» istemeý úshin bul aımaqtardy demalys oryndaryna aınaldyrdyq. Biz qalanyń óz erejesi bar ekenin bildirip otyrmyz», dedi.
Almatyda jan-jaqty josparlaýdyń jańa jobalaryna sáıkes, bazar aýmaqtary da kógaldandyrylady. Mysaly, Almaly aýdanynda Rozybakıev kóshesiniń boıyndaǵy «Tastaq» jáne «Kóterme saýda» bazarlaryn, Jetisý aýdanyndaǵy Soltústik aınalma joly boıyndaǵy bazarlardy jańǵyrtý, sondaı-aq sý qorǵaý beldeýlerin abattandyrý men tazartý kózdelgen. Jalpy saıabaqtardy, skverlerdi, býlvarlardy qosa alǵanda, jasyl jelekter alańyn 2030 jylǵa deıin 3 ese ulǵaıtý qarastyrylǵan.
Sonymen qatar júrdek kólik qańqasyn jáne ózara baılanysty kósheler jelisin engizý esebinen qalanyń barlyq aýdandary bir-birine qosylyp, shahar turǵyndary qalanyń kez kelgen jerine ońaı bara alady.
Baspasóz brıfınginde ýrbanıst Svıatoslav Mýrýnov bekitilgen jańa ETJ-niń taǵy bir ereksheligi oramdyq qurylysqa mán berýi deı kele: «Almatynyń polıortalyqtaryndaǵy jańa qurylys qalanyń tarıhı josparyna sáıkes júrgiziledi. Oramdyq qurylys – bul turǵyn úı keshenderi tyǵyz salynǵan qala emes, kósheler «tory». Bul jospar Barselonanyń Eshample jobasyndaǵy 133-te 133 metrlik qaǵıdasyna uqsas 150-de 240 metrge deıingi kóshe toryn qamtıdy. Barselona jobasynyń ereksheligi, aýa aınalý úshin qala keńistigin ońtaılandyrýǵa degen talpynys qana emes, «barshaǵa arnalǵan qala» úshin jaǵdaı jasaýdan turatyn keńistiktegi áleýmettaný ıdeıasyn júzege asyrý. Bul tujyrymdama qoǵamdyq ıgilikter men keńistikterge teń qoljetimdilikti qamtamasyz ete otyryp, árbir turǵyn úshin áleýmettik teńdik pen qalalyq ortaǵa qoljetimdiliginiń mańyzdylyǵyn kórsetedi», dedi.
«Qala turǵyndary arasynda júrgizilgen saýalnama jurttyń negizinen qalalyq ómir saltyna talpynatynyn kórsetti: turǵyndar úıine jaqyn jerde jumys istegisi, meıramhana jáne ózge de qyzmet túrlerin basqa aýdandarǵa barmaı-aq, ózderi turatyn mańnan tapqysy keledi. Sondyqtan ETJ búginde qala qurylysy tujyrymdamasyna kásibı mamandardyń yqpal etetinin qurylys salýshyǵa uqtyrady. Endi qurylys salýshy ákimdikpen ne salǵysy keletinin muqııat kelisýi kerek, sonyń arqasynda bir-birine mingesip qalǵan turǵyn úıler salý toqtaıdy», deıdi sarapshy.
Qysqasy, qalanyń ár aýdanyndaǵy qurylystyń oramdyq toryna kóptegen fýnksıonaldy nysan kiredi, bul jumyspen qamtý men jumys oryndaryn qurý máselesin sheshýge yqpal etpek.
«Búginde biz adamdar mamandyǵy men jumys ornyn jyldam ózgertýge májbúr bolatyn kezeńde ómir súrip otyrmyz. Al bul qala bıliginen jumys oryndarynyń qalaı qurylatynyn dál ári naqty tujyrymdaýdy talap etedi. ETJ-da mádenı ortalyqtar, úlken ekologııalyq óndiristik keńistikter men keńse ortalyqtarynyń qurylysy qarastyrylǵan, sonyń arqasynda jumyspen qamtý deńgeıi 45%-dan kem bolmaýy múmkin», deıdi Svıatoslav Mýrýnov.
Sol sııaqty jańa ETJ-da ınjenerlik jeliler úshin ótý arnalary qarastyrylyp otyr. Bul shara jol jáne trotýar jabynyn qoparmaı, kógaldarǵa zııan keltirmeı jóndeý jumystaryn júrgizýge múmkindik beredi.
«ETJ-da qyzmet kórsetýshi personal, jóndeý materıaly men jabdyqtary úshin uzyndyǵy 27 shaqyrym ótý arnalaryn ornatý kózdeledi. Bul ádis Samal shaǵyn aýdandaǵy qurylys kezinde synalyp, biraq tolyq engizilmeı, aıaqsyz qalǵan edi. Mundaı ádispen kommýnıkasııa ornatý qymbatyraq, alaıda uzaqmerzimdi keleshekte aıtarlyqtaı qarajat únemdeýge múmkindik beredi», dep otyr basqarma ókilderi.
ALMATY
