Foto: J. Jumabekov
Sóz basynda Májilis Spıkeri, «AMANAT» Tóraǵasy Erlan Qoshanov Prezıdent jedel sheshýdi qajet etetin eldegi eń mańyzdy máselelerdi aıqyndap bergenin atap ótti.
«Memleket basshysy Qasym-Jomart Toqaev tapsyrmany oryndaý kezindegi tıimsiz bıýrokratııalyq tásilderdi naqty mysal keltire otyryp aıtty. Búginde naqty nátıjege baǵyttalǵan kásibı tásil qajet. Bul qaǵıdany zań shyǵarý barysynda da ustanýymyz kerek. Májiliste ázirlengen árbir zań Prezıdenttiń memleketti damytýdy jáne halyqtyń ál-aýqatyn arttyrýdy kózdeıtin mindetterin júzege asyrý úshin jumys isteýi tıis», dedi «AMANAT» partııasynyń Tóraǵasy.
Májilis Spıkeri Memleket basshysy «AMANAT» usynǵan Premer-mınıstrdi taǵaıyndaǵanyn jáne bul sheshim Prezıdenttiń partııaǵa degen joǵary senimin, onyń el bolashaǵyna jaýapkershiligin kórsetetinin aıtty.
«Memleket basshysy ekonomıka ósimin jyl saıyn keminde 6 paıyz deńgeıinde qamtamasyz etý jáne 2029 jylǵa qaraı JIО́ kólemin 450 mlrd AQSh dollaryna jetkizý jóninde naqty mindet qoıdy. Osyǵan baılanysty, Parlament depýtattary men Úkimet birlesip, tyǵyz jumys isteýi kerek. Alda turǵan barlyq mindetti tek osylaı ǵana tıimdi júzege asyrýǵa bolady», dedi Erlan Qoshanov.
Prezıdent tapsyrmalaryn júzege asyrý jónindegi jıyn barysynda partııa fraksııasynyń músheleri de sóz aldy. Ashat Aımaǵambetov halyqty memlekettik áleýmettik qoldaý tetikterin qaıta qaraý boıynsha depýtattardyń atqaryp jatqan jumysy týraly, Nurtaı Sabılıanov Qurylys kodeksine jáne memlekettik satyp alý jónindegi jańa zań jobasyna túzetý engizý boıynsha depýtattardyń júrgizip jatqan jumysy týraly, Sergeı Ponomarev sý resýrstaryn tıimdi paıdalaný jáne Sý kodeksin ázirleý máselesi týraly, Bolatbek Najmetdınuly kólik-logıstıkalyq áleýetti damytý jónindegi sharalar týraly, Berik Beısenǵalıev bıýdjet jáne salyq saıasatynyń tıimdiligin arttyrý boıynsha óz usynysyn aıtty. Al Nurjan Áshimbetov Prezıdenttiń aýyl sharýashylyǵy baǵytyna qatysty tapsyrmalaryn júzege asyrý josparlary týraly málimet berdi.
Jıyndy qorytyndylaı kele Májilis Spıkeri Erlan Qoshanov «AMANAT» fraksııasy Prezıdent tapsyrmalaryn júzege asyrý jumysyn kúsheıtýi tıis ekenin atap ótti.
