- Shveısarııada shpagamen semserlesýden jasóspirimder arasyndaǵy Álem kýbogi aıaqtaldy. Bul jarysta Qazaqstan quramasy Polsha, Shveısarııa jáne AQSh sportshylaryn utyp, aqtyq synǵa deıin alqynbaı jetti. Fınalda jerlesterimiz áıgili Majarstan quramasyna ese jiberip, kúmis medaldi oljalady. Bizdiń komandanyń sapynda Bogdan Lýkın, Alekseı Kasatkın jáne Kırıll Prohodov syndy saıypqyrandar óner kórsetti.
- Birikken Arab Ámirlikteriniń (BAÁ) Fýdjeıra qalasynda taekvondodan G2 sanatyndaǵy halyqaralyq týrnır aıaqtaldy. Parsy shyǵanaǵyna attanǵan otandyq tatamı sheberlerimiz elge oljaly oraldy. Atap aıtsaq, Amanbol Begimbetov (63 kg), Iаsmına Narbaeva (62 kg) jáne Jansel Denız (73 kg) fınalda ǵana utylyp, kúmis medaldi moınyna ildi. Al jartylaı fınalda súringen Batyrhan Tóleýǵalı (80 kg), Beksultan Musahan (68 kg), Erasyl Orynbasar (74 kg) jáne Nurlan Myrzabaev (87 kg) qolaǵa qol sozdy.
- Halyqaralyq fýtbol federasııasy (FIFA) 2026 jyly AQSh, Kanada jáne Meksıkada jalaýy jelbireıtin álem chempıonatynyń negizgi oıyndary qaı jerlerde ótetinin jarııa etti. Bas júlde úshin tartys AQSh-tyń Nıý-Djersı shtatyna qarasty Ist-Raterford qalasyndaǵy «MetLaıf-Stedıýmde» uıymdastyrylady. Bul stadıon 82,2 myń kórermenge eseptelgen. Qola medal úshin tartysty Florıda shtatyna qarasty Maıamı qalasyndaǵy «Hard Rok Stedıým» qabyldaıdy. Atalǵan sporttyq nysan 65 326 adamdy syıdyra alady.
- Qatardyń bas shahary Dohada sý sportynan álem chempıonaty ótip jatqany belgili. Kúni keshe ǵana ártistik júzýden quramynda Nargıza Bolatova men Edýard Kım syndy dúldúlderi bar Qazaqstan quramasy aralas juptar saıysynda tarıhı altynǵa qol jetkizgeni týraly jazǵan edik. Endigi úmit – júzýshilerde. 11 aqpanda bastalatyn jarysta Ádilbek Mýsın, Egor Popov, Maksım Skazobsov, Arsen Qojahmetov, Adelaıda Pchelınseva, Ksenııa Ignatova, Sofııa Spodarenko jáne Dıana Tasjanova óner kórsetedi. Sol básekede taǵy bir júlde alýdy josparlap otyrmyz. Osy oraıda Ádilbek Mýsın men Adelaıda Pchelınsevaǵa aıryqsha senim artylyp otyr.
- 18 aqpanda Máskeýdegi «VTB Arenada» basketboldan VTB Biryńǵaı lıgasynyń «Juldyzdar matchy» ótedi. Atalǵan jarysqa barlyǵy 24 oıynshy qatysady. Solardyń arasynda «Astananyń» namysyn qorǵap júrgen amerıkalyq legıoner Roıs Hemm de bar. Shabýyl shebinde óner kórsetetin basketbolshynyń jasy – 24-te, boıy – 202 santımetr, salmaǵy – 102 kg.
- Taıaýda AQSh-tyń Las-Vegas qalasynda aralas jekpe-jekten ótken UFC týrnırinde kúsh synasyp, jergilikti faıter Charlz Djonsonnan jeńilgenine qaramastan qazaq sportshysy Azat Maqsum 66 myń dollar kóleminde tabys tapty. Onyń 12 myńyn jekpe-jekke shyqqany jáne 50 myńyn osy aıqas eń úzdik dep tanylǵany úshin aldy. Taǵy 4 myńy – demeýshiler tarapynan berilgen bonýs. Al Djonson 78 myń dollar shamasynda oljaǵa keneldi.
- Kásipqoı rıngte 16 kezdesý ótkizip, barlyǵynda jeńiske jetip, 11 qarsylasyn nokaýtqa jibergen 28 jastaǵy amerıkalyq Ostın Ýılıams orta salmaqta WBO men IBF nusqalary boıynsha álem chempıony atanyp otyrǵan Jánibek Álimhanulyn jekpe-jekke shaqyrdy. 30 jastaǵy qazaqtyń uly da jeńilistiń kermek dámin tatqan emes. Ol 15 básekeniń 10-yn merziminen buryn aıaqtady. Ýılıams óziniń sońǵy kezdesýin 4 aqpanda Las-Vegasta Germanııanyń ókili Armel Mbýmba-Iаssaǵa (10-1, 7 KO) qarsy ótkizip, ony altynshy raýndta uryp jyqty.
