Alǵashqy bolyp Dmıtrıı Popko (338 ATR) men Fransısko Cherýndolo (22 ATR) kortqa shyqty. Bul tennısshilerdiń deńgeı aıyrmashylyǵy jer men kókteı. ATR reıtınginde 22-orynǵa turaqtaǵan Argentınanyń ókili byltyr Rolan Garrostyń tórtinshi kezeńine deıin jetip, Bostad pen Istborndegi týrnırlerde top jardy. Popko úzdikter tiziminde 338-orynda tur. Sol sebepti de jergilikti sportshyǵa jerlesimizdi jeńý aıtarlyqtaı qıyndyq týǵyzǵan joq. Esep – 7:5, 6:2.
Kóp keshikpeı Tımofeı Skatov pen Tomas Martın Etcheverrı sheberlik baıqasty. Bul kezdesýdiń favorıti kort qojaıyny edi. Ol byltyr Rolan Garrostyń shırek fınalyna shyǵyp, bıyl Aýstralııanyń ashyq birinshiliginiń úshinshi aınalymynda súrindi. Desek te ATR reıtınginde 278-satyǵa jaıǵasqan otandasymyz álemniń 28-raketkasynan 6:4, 7:5 esebimen aılasyn asyrdy.
Kelesi kúngi jarys baǵdarlamasy juptyq básekelerden bastaldy. О́kinishke qaraı, Aleksandr Nedovesov pen Dmıtrıı Popko Maksımo Gonsales pen Andres Moltenıden 7:6, 4:6, 0:6 esebimen utyldy. Odan keıin Tımofeı Skatov pen Fransısko Cherýndolonyń tartysyn tamashaladyq. Birinshi sette argentınalyq tennısshi 4:1 esebimen alǵa shyqqanda úmitimiz úzilgendeı boldy. Osy joly jeńilsek, bul jarys biz úshin merziminen buryn aıaqtalatyn edi. Biraq Tımofeıdiń júıkesi temir eken. Ol oıyndy taı-breıkke deıin jetkizip, jeńisti qarsylasynyń ýysynan julyp aldy. Ekinshi sette de otandasymyz shabysynan jańylǵan joq. Esep – 7:6, 6:4.
Tarazy basy teńselip turǵanda Dmıtrıı Popko men álemniń 26-raketkasy Sebastıan Baes kortqa shyqty. Alǵashqy eki set teń aıaqtaldy – 6:4, 3:6. Sheshýshi tusta ekeýi de baryn saldy. Kezdesý taı-breıkke deıin ulasyp, bul joly Baevtyń baǵy jandy – 7:6. Sóıtip, bes básekeniń qorytyndysy boıynsha Qazaqstan quramasy Argentına tennısshilerinen 2:3 esebimen utyldy. Endi jerlesterimiz qyrkúıek aıynda pleı-off týrnırinde baq synaıdy. Jeńiske jetken jaǵdaıda olar Devıs kýboginiń irikteý saıystaryna qaıta qatysady. Al otandyq tennısshilerimizdiń pleı-offta kimmen kezdesetini sál keıinirek belgili bolady.
