Chempıonattyń maqsaty — áskerı qyzmetshilerdiń dene shynyqtyrý daıyndyǵy men sporttyq sheberligin arttyrý, salaýatty ómir saltyn nasıhattaý.
Jarystyń ashylý saltanatynda Ulttyq ulan Bas qolbasshylyǵynyń dene daıarlyǵy jáne sport bóliminiń bastyǵy polkovnık Sátjan Ábishov saıysqa barlyǵy jeti komanda jınalǵanyn málimdedi.
«Ishki ister mınıstriniń orynbasary – Ulttyq ulannyń Bas qolbasshysy general-leıtenant Erkin Botaqanovtyń atynan voleıbol jarysyna qatysýshylarǵa sáttilik tileımin. Saıysta tek qana myqty komanda jeńiske jetsin. Sondaı-aq jarysty ótkizýge qoldaý bildirgen Almaty oblystyq týrızm jáne sport basqarmasyna jáne Eńbekshiqazaq aýdanynyń ákimdigine alǵys bildiremiz», dedi polkovnık Sátjan Ábishov.
Sonymen qatar saltanatty sharada Almaty oblysynyń dene shynyqtyrý jáne sport basqarmasynyń bastyǵy Erbolat Sarabekovke «Ulttyq ulan úzdigi» keýde belgisi tabystaldy.
«Qurmetti sportshylar, qadirli qonaqtar, «Altyn adam» tabylǵan Esik qalasyna qosh keldińizder! Jarysqa qatysyp jatqan sportshylarymyzǵa sáttilik tileımin. Tek úzdik komanda jeńiske jetsin. Sol myqtylar aldaǵy ýaqytta halyqaralyq dárejedegi dodalarda el qorjynyna olja salsyn. Bastysy elimiz aman bolsyn», dedi Erbolat Sarabekov.
Almaty oblysynyń PD Arnaıy jáne jumyldyrý daıarlyǵy basqarmasynyń bastyǵy polısııa podpolkovnıgi Berik Nurǵalıev te jarys qatysýshylaryna sáttilik tiledi.
«Sportshy jaýyngerler, Ulttyq ulan patrıottary, Otan qorǵaýshylar, Almaty oblysynyń Polısııa departamenti basshylyǵy atynan sizderge sáttilik tileımin. Ala dopty bıikte áýeletken árqaısyńyz jeńiske laıyq jansyzdar. О́zderińizdeı sportty nasıhattap júrgen áskerı qyzmetshiler kóp bolsyn», dedi polısııa podpolkovnıgi Berik Alshynbaıuly.
Bıylǵy jarystyń basty favorıti – byltyrǵy chempıonattyń jeńimpazdary, ıaǵnı, «Batys» óńirlik qolbasshylyǵy. Bul joly úzdik voleıbolshylardy «Batys» О́ńQ ókili retinde 5546 áskerı bóliminiń dene daıyndyǵy jáne sport bastyǵy serjant Berdibek Ábdikereı bastap ákeldi.
«Biz bıyl da myqty daıyndyqpen keldik. Jigitter aldymen ózimizdiń óńirlik qolbasshylyqtaǵy ótken jarysta irikteldi. 15 kún oqý-jattyǵý jıynyn jasap, taktıkalyq daıyndyqtarymyzdy pysyqtap aldyq. Biz úshin búgingi jarysta osal qarsylas joq. Barlyǵyna da qurmetpen qarap otyrmyz. Maqsatymyz – jeńimpaz ataný. Bul úshin bizge barlyq jaǵdaı jasalǵan. Uıymdastyrýshylar da joǵary deńgeıde daıyndalǵan. Sportshylardy kútip alýdan bastap, ornalastyrýǵa deıingi sharýalar júıeli júrgizilgen. Sporttyq keshen – tamasha», dedi ol.
Jarys aınalmaly júıe boıynsha ótkiziledi. Ár kezdesý eki partııadan turady. Komandalar teń túsken jaǵdaıda 15 upaıǵa deıin qosymsha partııa oınalady. Partııadaǵy jeńisi úshin komandaǵa – 1 ball, utylǵany úshin – 0 ball beriledi. Chempıonat jeńimpazy kezdesýlerdegi jeńis sanynyń kóptigimen anyqtalady. Kórsetkish teń bolǵan kezde qos úmitker komanda betpe-bet kezdesýdiń nátıjesi boıynsha anyqtalady.
Atalmysh dodaǵa quqyqtyq tártip áskeriniń «Ońtústik» (Almaty q.), «Ortalyq» (Qaraǵandy q.), «Batys» (Oral q.) jáne «Shyǵys» (О́skemen q.) óńirlik qolbasshylyqtary men Ulttyq ulan Akademııasynyń (Petropavl q.), 5573 (Astana q.) jáne 6654 (Qarakemer kenti) áskerı bólimderiniń komandalary qatysyp jatyr.
Aıta keteıik, chempıonat jeńimpazy 9 aqpan kúni anyqtalady. Týrnır jeńimpazdaryna kýbok, medaldar jáne baǵaly syılyqtar beriledi. Júldegerler men qatysýshylar da marapattalady. Sonymen qatar, «Úzdik ámbebap oıynshy», «Úzdik buǵattaýshy», «Úzdik baılanystyrýshy», «Úzdik lıbero», «Týrnırdiń eń úzdik oıynshysy» nomınasııalary boıynsha jeńimpazdar anyqtalady.
