Ázirge baǵdarlamanyń sharttary týraly egjeı-tegjeı málimet joq. Degenmen aty aıtyp turǵandaı, paıyzdyq mólsherlemesi – jyldyq 9 paıyz, nesıeleý merzimi – 25 jyl. Ipotekaǵa qatysqysy kelgen azamat úı qunynyń 20 paıyzy mólsherinde alǵashqy tólem jasaýy kerek. Baǵdarlama jas otbasylarǵa arnalýy múmkin. Biraq naqtyly jas shekteýi týraly aqparat joq.
Osyǵan deıin baǵdarlama qatysýshylarynyń qatań tekseriletini aıtylǵan bolatyn. Baǵdarlamanyń negizgi sharty – úmitkerdiń sońǵy bes jyl kóleminde atynda baspanasy bolmaýǵa tıis.
«9-20-25» baǵdarlamasy boıynsha ótinim berý kezinde úmitkerdiń atynda sońǵy bes jylda baspana tirkelmegen bolýy kerek. Biz muny memlekettik derekter bazasy arqyly tekseremiz. «7-20-25» baǵdarlamasyndaǵydaı – alǵan páterińdi búgin satyp jiberip, erteń memlekettik baǵdarlamamen taǵy da ótinim berý áreketteri iske aspaıdy. Sonymen qatar jańa baǵdarlama boıynsha bir ret qana ótinim beriledi. «7-20-25» baǵdarlamasynda qatysý boıynsha shekteý bolǵan joq. Iаǵnı 2019 jyly páter satyp alǵan azamat baǵa óskenin paıdalanyp múlkin satyp, 2021 jyly taǵy da qatysýǵa múmkindik alatyn. Endi jańa baǵdarlamada mundaıǵa tyıym salynady», deıdi «Otbasy bank» basshysy Lázzat Ibragımova.
Ol baǵdarlamanyń jumys istep júrgen jastarǵa arnalatynyn meńzedi. Biraq jas boıynsha, jumys isteıtin orny boıynsha shekteýdiń bar-joǵyn aıtpady. Tek anyǵy – páterdi daıyn úılerden ǵana emes, «Qazaqstan turǵyn úı kompanııasynyń» kepildigi bar salynyp jatqan qurylystardan da rásimdeýge múmkindik qarastyrylady.
Baǵdarlamaǵa respýblıkalyq bıýdjetten 150 mlrd teńge bólinedi. Bir jylda shamamen 8 myń adam baspanaly bolady dep kútilip otyr.
