Elge kerek erekshe kampýs

Jańa korpýs sport, ǵylym jáne óner álemin erkin aralatýǵa qaýqarly. Sebebi onda planetarıı, 400 oryndyq amfıteatr, IT jáne STEM zerthanalary, 7 myń kitap qoryna arnalǵan kitaphana, horeografııa jáne fıtnes zaldary, shahmat klýby, qysh buıymdary men beıneleý óneri sheberhanalary, kovorkıngter, tipti dybys jazý stýdııasy bar. Munyń bári aldyn ala oqýshylardan alynǵan saýalnama negizinde salynǵan. Al bilim nysanynyń jobasy Fınlıandııa, Danııa, AQSh elderindegi mektepter sáýletiniń halyqaralyq tájirıbesine saı salynǵan. IQanat oqý aýylyndaǵy alǵashqy úı «Freedom House» dep ataldy.

– Elimizdiń basty baılyǵy – adamdar. Bir adamnyń ózi kóp nárseni jasaı alady, al bári­miz birge úlken belesti baǵyndyra alamyz. Eli­mizdiń bolashaǵy siz ben biz qanshalyqty bilim­di bolatynymyzǵa jáne elge degen súıis­pen­shili­gimizdiń naqty is júzinde kórinis berýine tike­leı baılanysty. Qazirgi kezde osynda oqı­t­yn balalar bizdiń elimizdi jaqsy jaqqa óz­gerte alady. Olardyń kópshiligi bıznes­te, ǵylymda, memlekettik basqarýda, ónerde, sport­ta jetistikke jete alatynyna senimdimin. Al mun­da alynǵan bilim belgili bir ónege-úlgige aına­lyp qana qoımaı, teńsizdik máselesin sheshý­ge eleýli úles qosady, – dedi 2019 jyldan beri «IQanat» jobasynyń qamqorshysy Tımýr Týrlov.

Jańa kampýsta mektep oqýshylary da, IQanat olım­pıadasynyń aqtyq synyna jetken aýyl bala­lary da kókjıegin keńeıtedi. Munda olımpıa­dadan keıingi úsh jyldyq baǵdarlamanyń qatysýshy 1700 aýyl oqýshysy únemi mektepke qarqyndy kýrstan ótýge kelip turady. Mektep oqýshylaryna da qosymsha bilim alatyn, óz qabiletterin ary qaraı jetildiretin jer kerek. Elde joq erekshe korpýs osy ıgilikterge jumys isteıdi.

Kásipkerlerdiń bilim-ǵylymǵa qoldaý kór­setip, jaǵdaı jasaýy – tamasha úderis. Bul – damy­ǵan elderde erterekte jolǵa qoıylǵan úrdis. Jobanyń bastamashysy jáne qamqorshysy Aıdyn Rahymbaev kásipkerler bilimge baǵyt­tal­ǵan bastamalardy qoldaýy kerek degen másele kóterdi. Onyń aıtýynsha, jastardyń elge qyzmet etý degen oıyn gúldetip, únemi sýaryp otyrýymyz kerek. Paıdasy orasan osyndaı jobalar jasa­saq, keleshek urpaqtyń taǵdyry, tabysy men bilim deńgeıi de múlde basqa bolady. Qamqorlyq kórip ósken bala óz aýylynyń damýyna da áser etedi, qarjylaı kómek kórsetedi. Jalpy, munyń bári jaq­sylyqtyń jaǵasynda mýltıplıkatıvti nátıje kórsetedi.

– Kásipkerlerdiń uzaqmerzimdi jáne aýqymdy ıgilikterdi bastaýǵa degen shynaıy nıeti bolsa, bilim berýge ınvestısııa salý kerek. Barlyq nıet tanytýshylar bizdiń bastamaǵa qosyla alady. Osylaısha, biz ulttyń damýyna eń úlken úles qosamyz. IQanat – otandyq kásipkerler jobasy. Izgi qoǵamdastyǵymyzǵa atsalysýshylar sany búginniń ózinde 150-den asady. Bul degenińiz, balyq emes, qarmaq beremiz. Máselen, IQanat mektebin mysal etsek. Biz qoldaıtyn balalar ózderi er jetkende elge qyzmet etýge, muqtaj adamdarǵa, otbasylarǵa qolushyn sozýǵa asyǵatyny anyq, – deıdi A.Rahymbaev.

Aıta keteıik, bıyl joba úshin erekshe jyl bolmaq. «IQanat – Myń bala» retinde atalyp, qor baǵdarlamalarymen balalardyń rekordtyq sany qamtylmaq. Aýyl balalarynyń órisin keńeıtip otyrǵan «IQanat» mektebiniń qanaty talmasa, áli talaı belesterdi baǵyndyryp, bıik ushary anyq.