Foto: abdenkarakat
«Búgingi qoldanystaǵy zańnamaǵa sáıkes aýyl muǵalimderiniń jalaqysy men tarıftik stavkalary qalalalyq muǵalimderdiń stavkalarymen salystyrǵanda 25 paıyzǵa kóterildi. Atalǵan zańnyń nátıjesinde aýyl muǵaliminiń jaǵdaıy túzeldi. Bul aýyldaǵy oqýshylarǵa qala mektepterimen teń dárejede bilim berý úshin qabyldanǵan durys sheshim edi. О́kinishke qaraı munda bir másele bar. Turǵylyqty halyq sany ortasha aýyldan az bolsa da mártebesi qala nemese kent statýsyna ıe bolǵan eldimeken muǵalimderiniń jaǵdaıy osyndaı. Barlyq talap boıynsha aýyldyq eldimekenderge jatatatyn kentter men shaǵyn qaladaǵy muǵalimder zańda bekitilgen 25 paıyzdyq qosymsha tólem alatyn aýyldyq koeffısıentke qol jetkize almaı otyr. Iаǵnı olar turatyn eldimekenniń qala, kent degen ákimshilik mártebesi tek qaǵaz júzinde ǵana. Qala nemese kent bolǵanymen shyntýaıtynda kádimgi aýyl. Mysaly Ulytaý oblysy Qarajal qalasy men Jáırem kenti. Qarajalda 8 myń adam, Jáıremde 9 myń turǵyn bar. Osy jerden 20 shaqyrym jerdegi Jeńis aýylynyń muǵalimderi aýyldyq koeffısıentti alady. Al oblys ortalyǵy Jezqazǵannan 220 shaqyrym, Qaraǵandydan 500 shaqyrym qashyqtyqta ornalasqan Qarajal men Jáıremniń muǵalimderi atalǵan ústemaqylardan, tıisti áleýmettik kómekten, qalalyq emhanalarǵa qaralý sekildi múmkindikterdi ala almaıdy. Sol sebepti de Jáırem kentiniń muǵalimderi kórshi aýyldarǵa baryp jumys isteýge májbúr.
«Aýyl» partııasy halyq sany 10 myń adamǵa jetpeıtin kentter men aýyldyq mańyzy bar shaǵyn qalalar boıynsha máseleni muqııat zerttedi. Ulttyq statıstıka bıýrosynyń málimetteri boıynsha halyq sany 10 myńǵa jetpeıtin qala, kent statýsyna ıe 36 eldimeken bar. Munda 70-ten astam jalpy bilim beretin memlekettik mektep bar. О́ńirlerdegi osyndaı kentter men qalalalardyń muǵalimderin qoldaý qajet. Shalǵaıdaǵy mektepterdiń barlyq aýyldyq belgileri bar konsepsııaǵa tolyqtaı sáıkes keletin eldimeken muǵalimderine aýyldyq koeffısıent qoljetimdi bolýy tıis», dedi Q.Ábden.
Depýtat Úkimet basshysynan ákimshilik mártebesi qala ne kent bolǵanyna qaramastan kádimgi aýyl tirligin keship otyrǵan shalǵaıdaǵy eldimeken muǵalimderi úshin aýyldyq koeffısıentti engizýdi surady.
