Foto: TJM
Qaraǵandy oblysynyń Tótenshe jaǵdaılar departamentiniń naqtylanǵan málimetterine sáıkes, saǵat 15:00-degi jaǵdaı boıynsha úıindilerdi shyǵarý jalǵasyp jatyr. Úıindiniń 90 paıyzy tazartyldy.
Birinshi qabat deńgeıinde garaj qorabynda avtokólikter tabyldy, onyń ishinde gaz jabdyǵy bar delinedi. Qutqarýshylar zardap shegýshiniń aıǵaqtaryna súıene otyryp, jertólede turǵan kóliktegi gaz jabdyǵynyń aqaýy týraly nusqany alǵa tartty.
«1993 jyly týǵan jábirlenýshiniń dúkenge kirip, ottyq satyp alyp, ony tekserý maqsatynda tutatqany anyqtaldy. Osy ýaqytta 2-3 sekýnd ishinde jarylys bolyp, qabyrǵalar qulaǵan. Osyǵan baılanysty gaz-aýa qospasy jarylǵan degen nusqa qarastyrylyp otyr. Oqıǵanyń sebebi men mán-jaıy anyqtalyp jatyr», dep habarlady vedomstvo ókilderi.
Qazaqstan Respýblıkasy Qylmystyq kodeksiniń 292-babynyń 2-bóligi «Abaısyzda adam ólimine ákep soqqan órt qaýipsizdigi erejelerin buzý» boıynsha qylmystyq is qozǵaldy.
Eske sala keteıik, búgin tańǵy saǵat 08:06-da Temirtaýda eki qabatty dúkende gaz jarylǵan. Qutqarýshylar úıindi astynan 1973 jyly týǵan áıeldiń denesin tapty. Belgili bolǵandaı, marqum dúken satýshysy bolǵan. Taǵy bir áıel úıindi astynan shyǵarylyp, qazir aýrýhanada jatyr.
