Taý etegindegi aýyldarǵa barar joldar jabylyp, elektr jaryǵy óshken, kógildir otynnan ajyratylyp, áp-sátte ábigerge túsken jurttyń úıden shyqpaı borannyń basylýyn kútýden basqa amaly bolmas. Biraq... Túngi ekiden keıin tolǵaǵy qatty qysqan Tólebı aýdany Alataý aýylynyń turǵyny Janna Sársenova jedel járdem shaqyrady. Jedel járdem kóligi aýylǵa jayndaǵanda qalyń qardan shyǵa almaı qalǵan. Júrgizýshini qaldyryp, ózderi qajetti jabdyqtarymen jaıaý ketken jedel járdem qyzmetkerleri aıaǵy aýyr kelinshekke tıisti kómekti kórsetip úlgergen. Aıy-kúni jetip otyrǵan kelinshekti perzenthanaǵa ýaqtyly jetkize almaıtyn bolǵandyqtan, úı jaǵdaıynda telefon jaryǵymen bosandyryp alypty. «Bes ulym bar. Qyzymnyń borandatyp dúnıege kelgeni umytylmaıtyn boldy. Jedel járdem kelgen soń, 5-10 mınýttan keıin bosandym. Borannan shyǵa almadyq», deıdi kópbalaly ana.
«Úı tas qarańǵy, gaz joq bolǵandyqtan sýyq edi. Perzenthanaǵa qajetti ýaqytta jete almaıtynymyzdy bilgendikten, jolda náresteni jaýratyp almaý úshin úıinde bosandyrýǵa týra keldi. 03:27-de úıinde bosandyrdyq, dúnıege qyz keldi», deıdi Tólebı aýdandyq №12 jedel járdem beketiniń feldsheri Erbol Sartaev sol túndi eske alyp.
Jedel járdem mamandary qaıta jolǵa shyǵý qaýipti bolǵandyqtan, tótenshe jaǵdaı qyzmetkerlerin kútip, tek 1 jarym saǵattan soń perzenthanaǵa shyqqan.
«Shaqyrý boıynsha shyǵyp bara jatqanymyzda joldardy qar basyp qalǵan edi. О́zim jol salyp bardym. Biraq kórsetilgen mekenjaıǵa jete almaı qaldyq. Feldsher jigitter «kerek zatymyzdy alyp kete bereıik, siz shyǵyp artymyzdan kelińiz» dedi. Taýly aımaq bolǵan soń aýa raıynyń kúrt ózgeretinin bilemiz, kúrek salyp alǵanbyz kólikke. Joldy tazalap, bulardan soń 20 mınýttan keıin bardym», deıdi júrgizýshi Asan Altaev.
Búginde bes uldan keıin dúnıege kelgen Aqnıet esimdi sábıdiń jaǵdaıy jaqsy. Dárigerler densaýlyǵyna tónetin qaýiptiń bolmaǵanyn aıtady.
«Náreste salmaǵy 3,3 kılo, boıy 54 sm bolyp jaryq dúnıe esigin ashty. Bul kisi negizi perınataldy ortalyqta bosanýǵa tıis. Biraq tolǵaǵy tez arada údep, úlgermeı qaldy. Borannan shyǵa almaı qaldy. Nárestesiniń de, óziniń de jaǵdaıy jaqsy kúıde jetkizildi. Kelgeli beri eshqandaı aýytqýlary joq. Balasyn emizip, ózin jaıly sezinedi», deıdi perzenthana bóliminiń meńgerýshisi Janat Nurymbetova.
Osylaısha, borandy túnde shaqyrtýǵa barǵan aýdandyq №12 jedel járdem beketiniń qyzmetkerleri Erbol Sartaev, Asan Altaev, Pernebek Nurjan qolaısyz aýa raıyna qaramastan, aıaǵy aýyr anaǵa shuǵyl kómek kórsete bildi.
Aıta ketelik, jyl basynan beri Leńgir perzenthanasynda 78 bala dúnıe esigin ashqan. Al borandy kúni 4 áıel bosanǵan. Onyń úsheýi – qyz, bireýi – ul.
Túrkistan oblysy
