Fınalda utyldy

Bastapqy básekelerde qy­taı­lyq Chjý Lın (№57) men ame­rıkalyq Emma Navarro­dan (№23) aılasyn asyrǵan Qa­zaqstannyń tennısshisi shırek fınalda Leıla Fernandespen (№38) kezdesti. Kanadanyń ókili osydan úsh jyl buryn nebári 18 jasynda US Open týrnıriniń fınalynda oınap, jer jahan jankúıerleriniń nazaryn ózine aýdarǵan edi. Birinshi sette 1:4 esebimen uty­lyp jatqan Elena kambek jasap, jeńisti qar­sy­lasynyń ýysynan julyp áketti – 6:4, 6:2. Jartylaı fınalda jerlesimizdiń joly reseılik Anastasııa Pavlıýchenkovamen (№32) qıysty. 32 jastaǵy Samaranyń týmasy – To­kıo Olımpıadasy men Dúnıe­jú­zilik Ýnıversıadanyń jeńim­pazy, 2021 jyly Rolan Garrostyń fınalısi. Parıjdegi «Úlken dýlyǵa» sanatyndaǵy jarystyń shırek fınalynda olar ózara kezdesip, bul básekede Pavlıýchenkova basym túsken edi. Bul joly Rybakına ketken eseni qaıtardy. Esep – 6:2, 6:4.

Fınalda otandasymyz Inga Shventekpen sheberlik baı­qasty. Polshanyń maqtanyshy «Rolan Garrosta» úsh ret top jaryp, AQSh-tyń ashyq birin­shiliginde bir márte dara shyqty. WTA týnırlerinde 17 ret bas júldeni oljalady. Bul básekeni óte jaqsy bastaǵan Elena áý basta 4:1 esebimen alda kele jatty. Sol kezde dopty oıynǵa qosý barysynda ol raketkamen abaısyzda óz aıaǵyn qatty soǵyp alyp, dá­­rigerlerdiń kómegine jú­ginýge májbúr boldy. Sol áser etse kerek, odan keıin Ryba­kı­nanyń oıyny múlde júr­medi. Nátıjesinde, otandasymyz 6:7, 2:6 esebimen jeńilis tapty.

Jalpy, bıylǵy maýsym Elena Rybakına úshin sátti bas­taldy dep aıtýǵa barlyq negiz bar. Aýstralııanyń ashyq birin­shiliginde sátsiz óner kórsetkeni bolmasa, Brısben men Ábý-Da­bıdegi dúbirli dodalarda dara shyqty. Dohadaǵy týrnırdiń aqtyq synynda ǵana utyldy. Qatardaǵy jarystyń fınalyna shyqqany úshin Rybakına 308 320 dollardy qaltasyna basyp, 650 reıtıngtik upaıdy enshiledi.

Al áıelder arasyndaǵy Qazaqstannyń ekinshi raketasy Iýlııa Pýtınseva keıingi kezderi jıi súrinip júr. Jerlesimiz Dýbaıdaǵy WTA týrnıriniń irikteý saıysynyń ekinshi kezeńinde polshalyq Magdalena Frengke jol berdi – 3:6, 6:3, 4:6.

Aleksandr Shevchenko (№57) Rotterdamdaǵy týrnır­diń tusaýkeser kezdesýinde Qytaıdyń ókili Chjan Chjıch­jenge (№50) shań qaptyrsa, kelesi kezeńde ATR tiziminde jetinshi orynda turǵan danııa­lyq Rýne Holgerdi 6:4, 1:6, 6:3 esebimen utyp, sen­sasııalyq nátıje tirkedi. Jar­tylaı fınalda Aleksandr úzdikter reıtınginde 13-satyǵa jaıǵasqan Grıgor Dımıtrovpen kúsh synasty. Osydan biraz jyl buryn Bolgarııanyń betkeustary Ýımbldon, AQSh pen Aýstralııanyń ashyq birinshilikterinde úzdik tórt tennısshiniń qatarynan kó­ringen. Qos sańlaqtyń saıysynda Dımıtrovtyń mysy basym boldy – 7:6, 3:6, 6:4.

AQSh-tyń Florıda shtatynda ótip jatqan halyqaralyq týrnırde Dmıtrıı Popko bas júldege talasý múmkindigine ıe boldy. Shırek fınalda amerıkalyq Aksel Nefeni utqan ol jartylaı fınalda rýmynııalyq Gabı Adrıan Boıtadan basym tústi. Sheshýshi oıynda otandasymyz Andreas Andrade (Ekvador) pen Aleks Rybakov (AQSh) arasyndaǵy kezdesýdiń jeńimpazymen kúsh synasady. Bul – bir apta ǵana ýaqyt aralyǵynda Popkonyń ITF týrnırlerinde ekinshi ret fınalǵa shyǵýy. Jýyrda ǵana ol Sanraızdegi jarystyń je­ńimpazy atandy.

Bahreıniń astanasy Ma­namada Mıhaıl Kýkýshkın jaqsy oıyn órnegin kórsetti. Jartylaı fınalda ol chehııalyq Iаkýb Menshı­kovty 6:3, 6:2 esebimen jolynan yǵystyrdy. Bas júlde úshin báse­kede jerlesimiz fransııalyq Rıshar Gaskeni utty – 7:6, 6:4. 2018 jylǵa deıin «Chellendjer» sana­­tyndaǵy saıystarda 14 ret top jarǵan Kýkýshkınniń sodan beri uzaq ýaqyt boıy baǵy janbaı júr­gen edi. Mine, endi araǵa alty jyl salyp, ol óziniń 15 tıtýlyna qol jetkizdi.