Aıta ketý kerek, osy ýaqytqa deıin Dımash birde-bir mekemede dál osyndaı kezdesý ótkizbegen. Eń alǵashqy júzdesýin Shekara akademııasynan bastaýy jas kýrsanttar úshin úlken qýanysh boldy. «Ulyq bolsań, kishik bol» degen ata-baba támsilin berik ustanǵan áıgili ánshi kezdesýge qatysqan qonaqtardy óziniń qarapaıymdylyǵymen, mádenıettiligimen qaıran qaldyrdy.
Ánshimen suhbat barysynda polkovnık D.Belǵojaev pen maıor A.Dostaev oǵan eki tilde suraq qoıyp, kezdesýdi júrgizip otyrdy. Orys tilinde qoıylǵan saýaldarǵa da memlekettik tilde ǵana jaýap bergen Dımash óziniń til janashyry ekenin baıqatty. Kýrsanttar da oǵan kókeılerinde júrgen saýaldaryn joldady. Sońynan olardyń biri Dımashqa jasyl kúnqaǵarly shekarashylardyń fýrajkasyn syıǵa tartsa, endi biri Aleksandr Bektiń «Arpalys» kitabyn tartý etti. Sanaýly aıdan keıin qos juldyzdy ıyǵyna qadap, leıtenant atanatyn túlekterdiń biri, kýrsant N.Aldajuman Dımashty maýsym aıynda ótetin leıtenanttar keshiniń qurmetti qonaǵy bolýǵa shaqyryp, ótinish jasady. Ári qaraı kýrsanttar Shekara akademııasynyń ánuranyn naqyshyna keltire shyrqady.
Kezdesý keshinde «Jas shekarashy» balalar áskerı-patrıottyq klýbynyń tárbıelenýshileri de ánshige bir qushaq gúli men «Qazaqstan» shokoladyn syıǵa tartty. Dımash Qudaıbergenniń qyzyqty áńgimelerin muqııat tyńdaǵan kýrsanttar men áskerı qyzmetshiler mundaı qaıtalanbas keshtiń árbir sátin qalt jibermeı, kezek-kezek estelik sýretke túsip, máre-sáre boldy.
Kezdesý sońynda akademııa basshylyǵy kezdesýge arnaıy kelip, kýrsanttarmen jáne áskerı qyzmetshilermen taǵylymdy kesh ótkizgeni úshin Dımash Qudaıbergenge rızashylyqtaryn bildirip, alǵysyn aıtty.
